Megapolıstegi balalar aýrýhanasynyń neırohırýrgteri qytaılyq bilikti mamannyń qatysýymen alǵash ret jambas músheleri qyzmetiniń buzylýy bar 15, 17 jastaǵy eki jasóspirimge joǵary tehnologııalyq operasııa jasady. Bul pasıentter ómirge julynnyń týabitti aqaýy – «spina bifida» dıagnozymen kelgen. Dúnıejúzilik densaýlyq saqtaý uıymynyń derekterine súıensek, atalǵan patologııa jańa týǵan árbir myń náresteniń bir-ekeýinde ǵana kezdesedi eken.
Aýrýhana dırektory Marat Rabandııarovtyń aıtýynsha, mundaı aýyr dıagnoz naýqastyń ómir súrý sapasyna keri áserin tıgizedi. Atap aıtqanda, aıaq bulshyq etteri álsizdenip, júkteme túskende aýyrsyný paıda bolady, eń qıyny – kishi, úlken dáretti ustaý fýnksııalary buzylady.
Mundaı jaǵdaıda balalar qatarlastary sekildi erkin qozǵalyp, sportpen shuǵyldana almaıdy. Bul fızıkalyq shekteýmen qosa, jasóspirimderdi áleýmettik, psıhologııalyq turǵydan oqshaýlap, kúızeliske ushyratatyny belgili. Konservatıvti em-dom kútken nátıjeni bermeıtindikten, zamanaýı medısına sakraldy neırostımýlıasııa ornatýǵa, ıaǵnı máseleni hırýrgııalyq jolmen sheshýge basymdyq beredi.
Kúrdeli operasııa barysynda aýrýhananyń bilikti neırohırýrgteri Danııar Sábdenalıev, Azamat Jaıylǵanov, Roza Tansarova, anestezıolog Jandos Sholaqov qytaılyq professor Gýan Iýınhýeımen tize qosa otyryp, naýqastardyń segizkózine stımýlıatordy sátti ornatty. Qarapaıym tilmen túsindirsek, bul qurylǵy segizkóz kanaldaryna elektrlik ımpýls berý arqyly aýyrsynýdy basyp, organdardyń jumysyn jaqsartýǵa múmkindik beredi.
Naýqastardy irikteý, stımýlıatordy baptaý jumystaryn júrgizgen nevropatolog-neırofızıolog Gúlnur Qasenova operasııadan keıin pasıentterdiń densaýlyǵynda oń dınamıka baıqalyp, zár shyǵarý qyzmetiniń jaqsarǵanyn atap ótti.
Álemniń jetekshi klınıkalarynda keńinen qoldanylatyn ozyq ádistiń Almatydaǵy iri balalar aýrýhanasynda qolǵa alynýy – otandyq densaýlyq saqtaý salasyndaǵy eleýli oqıǵa. Bul bastama hırýrgııalyq kómekke muqtaj talaı baldyrǵannyń tolyqqandy ómirge oralýyna jol ashady.
Aıta keteıik, joǵary tehnologııalyq operasııalar mindetti áleýmettik medısınalyq saqtandyrý júıesi aıasynda tegin jasaldy. Jalpy, elimizdegi barlyq bala memleket tarapynan saqtandyrylǵan sanatqa jatady.
ALMATY
