Kásipkerlerge qolaıly ekonomıkalyq alań

Salyq jeńildikteri qarastyryl­ǵan alańda kásip ashqysy keletin otan­dyq jáne sheteldik bıznesmenderdiń qatary kóbeıip keledi. Ári arnaıy ekonomıkalyq aımaqtyń Aqtaý qala­symen shektelmeı, Jańaózen qala­synda da óz alańyn ashýy óńirdegi kásip­kerlerge qolaıly bolyp otyr. Qazir munaıly qalada AEA-nyń eki sýbaımaǵy ornalasqan.

Mundaǵy nysannyń biri – ónerká­sip aımaǵy. Jalpy kólemi 280 gektardy quraıtyn alyp aýmaqtyń ózin­de óńirdiń ındýstrııalyq áleýe­tin arttyrýǵa baǵyttalǵan úsh ınvestısııa­lyq joba júzege asyrylyp jatyr. Jýyrda «Kaskor-Mashzavod» munaı-gaz salasyna arnalǵan sorap­tyq-kompressorlyq qubyrlar men soraptyq shtangalar óndirý jobasyn iske qosty. Jylyna 540 myń dana soraptyq shtanga men 51 myń tonna qubyr shyǵaratyn óndiristik qýattaǵy kásiporyn tolyq deńgeıge kóterilgende 250 jańa jumys orny ashylady. Investısııa kólemi 17,3 mlrd teńgeni quraıtyn kásiporynda qazir jumysshylardy qabyldaý, oqytý úrdisteri júrip jatyr.

Alańdaǵy ekinshi nysan – Jańa­ózende asfaltbeton qospasyn óndirý jobasy. 5 gektar aýmaqta ornalasqan, quny 300 mln teńge bolatyn bul shaǵyn óndiris 15 adamdy jumyspen qamtyp, jumystaryn jol men ınfraqurylym baǵytynda júrgizedi.

Al polıetılen qubyrlaryn óndirý jáne munaı-gaz salasyna arnalǵan qubyrlarǵa ishki qorǵanysh qaptama jasaýǵa negizdelgen kásporyn 3 gektar aýmaqty qamtıdy. Investısııa kólemi 12 mlrd teńgeni quraıtyn kásiporyn iske qosylǵan soń 50 adamdy turaqty jumyspen qamtıtyn bolady.

– Jalpy, arnaıy ekonomıkalyq aımaqtyń negizgi maqsaty – halyqty turaqty jumyspen qamtý. Osy baǵyt­ta ınvestorlar tartylyp, jańa óndi­ris­terdi iske qosýǵa qolaıly jaǵ­daı jasalyp, kásipkerlerge ınfraqury­lymdyq, ákimshilik qoldaý kórseti­ledi. Bul baǵyttaǵy jumys aldaǵy ýaqyt­ta da júıeli túrde jalǵasyn taba bere­di, – deıdi «Aqtaý teńiz porty» AEA at­qa­rýshy dırektory Gúlmıra Aıtkenqyzy.

Sondaı-aq Úkimettiń 2025 jylǵy 5 jeltoqsandaǵy qaýlysyna sáıkes «Aqtaý teńiz porty» AEA aýmaǵyna Kendirli kýrorttyq aımaǵy qosylyp, arnaıy ekonomıkalyq aımaqtyń jalpy aýmaǵy 9 814 gektarǵa jetti. Nátı­jesinde, AEA ındýstrııalyq, porttyq, logıstıkalyq jáne týrıstik baǵyttaǵy 15 sýbaımaqty qamtýǵa qol jetkizdi.

Mańǵystaý oblysy