Saraptama qorytyndysyna súıensek, qyzmet kórsetý, shyǵarmashylyq, áleýmettik baǵyttaǵy mamandyqtar jónindegi kórsetkish ortasha deńgeıde saqtalǵan. Al medısına, qaýipsizdik, ákimshilik salalaryndaǵy keıbir mamandyqtarǵa eńbek naryǵynda suranys báseńdegen. Osyǵan oraı, 2026 jylǵa arnalǵan memlekettik bilim berý tapsyrysyn bólý kezinde suranysy tómen mamandyqtar qysqartylyp, granttardy ınvestısııalyq jobalar men óńirdiń naqty kadrlyq qajettiligine tikeleı baǵyttaý kózdelip otyr.
Jalpy, óńirde byltyrǵy «Jumysshy mamandyqtar jyly» aıasynda tehnıkalyq, kásiptik bilim berý júıesin jetildirý baǵytynda júıeli jumystar jalǵasyp jatyr. Oblystyq bilim basqarmasy basshysynyń mindetin atqarýshy Ǵalymjan Orynovtyń málimetinshe, búginde aımaqta 50 kolledj (28-i – memlekettik, 22-si – jekemenshik) qyzmet kórsetedi. Bul oqý oryndarynda 84 mamandyq boıynsha bilim alyp jatqan 46 747 stýdenttiń 79%-y memlekettik tapsyrys negizinde oqıdy.
– 2024–2025 oqý jylynda oblys kolledjderin támamdaǵan 12 619 túlektiń 81%-y jumysqa ornalasty. Bul – aldyńǵy jylmen salystyrǵanda 5%-ǵa joǵary kórsetkish. Bıylǵy oqý jylyna bólingen 15 500 memlekettik granttyń 57%-y naq osy jumysshy mamandyqtaryna baǵyttalyp otyr, – deıdi Ǵ.Orynov.
Sondaı-aq óńirde dýaldy oqytý júıesi qarqyndy damyp keledi. Oblys aýmaǵyndaǵy 692 kásiporynmen jasalǵan kelisimder sheńberinde 36 kolledjde 11 223 stýdent óndirispen qatar bilim alyp shyǵady. Halyqaralyq áriptestik te jolǵa qoıylǵan: 12 kolledj sheteldik oqý oryndarymen 20 memorandýmǵa otyryp, qos dıplom berý, akademııalyq utqyrlyq jáne pedagogterdiń biliktiligin arttyrý jobalaryn júzege asyryp jatyr. Byltyr úsh kolledj halyqaralyq akkredıtteýden ótken. Bıylǵy josparda stýdentterdiń sabaqqa qatysýyn sıfrlyq formatta baqylaý, memlekettik tapsyrysty ınvestısııalyq jobalarmen ushtastyrý, dýaldy oqytýdy iri ınvestorlarmen birlese keńeıtý basymdyqqa ıe bolady.
Jumyspen qamtý salasyndaǵy kórsetkishterge toqtalsaq, byltyr bekitilgen «О́ńirlik jumyspen qamtý kartasy» aıasynda aýqymdy sharalar atqaryldy. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Mekenhan Qozyhanulynyń aıtýynsha, josparlanǵan 130 769 jumys ornynyń ornyna, jyl qorytyndysynda 147 719 azamat jumyspen qamtylyp, meje artyǵymen oryndalǵan. Onyń ishinde 100 046-sy – turaqty, 47 673-i – ýaqytsha jumys oryndary. Nátıjesinde, jumyssyzdyq deńgeıi 4,6%-ǵa deıin tómendedi.
Eńbekpen qamtý sharalary bes negizgi baǵyt boıynsha júzege asyryldy. Ulttyq, jeke ınvestısııalyq jobalar aıasynda 4 074 jumys orny qurylsa, «10 myń turǵynǵa 100 jańa jumys orny» bastamasymen 22 595 adam jumysqa kirisken. Sýbsıdııalanatyn jumys oryndary, bos jumys oryndaryna ornalastyrý, grant berý boıynsha da tıisti ındıkatorlar tolyq oryndaldy.
2026 jylǵa arnalǵan «О́ńirlik jumyspen qamtý kartasy» sheńberinde 74 516 adamdy (54 481 – turaqty, 20 035 – ýaqytsha) jumyspen qamtý josparlanyp otyr. Onyń ishinde 40 588 azamatty bos jumys oryndaryna joldaý, ulttyq jobalar esebinen 2 472 adamdy jumysqa tartý kózdelgen. Sondaı-aq «10 myń turǵynǵa 100 jańa jumys orny» jobasy sheńberinde 11 476 turǵyndy, sýbsıdııalanatyn jumys oryndary arqyly 18 530 adamdy eńbekke baýlý, 1 450 adamǵa grant berý mejelengen.
Túrkistan oblysy
