Tulǵa mereıtoıyna Qurmanǵazy atyndaǵy ulttyq halyq aspaptar orkestriniń erekshe mán berýi beker emes. Sebebi ult qaıratkeri 1934 jyly 11 dombyrashydan quralǵan shaǵyn ansambl negizinde búginde álemge tanymal orkestrdiń negizin qalap, onyń tuńǵysh kórkemdik jetekshisi ári bas dırıjeri boldy. О́ner ıesi, sondaı-aq, ulttyq mýzykaǵa tereń ǵylymı zertteýler júrgizip, qazaqtyń kúı ónerin kásibı deńgeıge kóterip, ony halyqaralyq mádenı keńistikke tanytqan biregeı tulǵa retinde tarıhta qaldy.
Kórnekti kompozıtor mereıtoıyna arnalǵan konsert baǵdarlamasynda Ahmet Jubanovtyń sarqylmas mýzykalyq murasynan tańdaýly shyǵarmalar oryndalyp, qazaq mýzykasynyń qalyptasý kezeńderi kórkem áýen arqyly jańǵyrdy. Ult rýhyn asqaqtatqan týyndylardy Qazaqstannyń eńbek sińirgen qaıratkeri Tolqyn Zabırova, Abaı atyndaǵy memlekettik akademııalyq opera jáne balet teatrynyń solısi Aıdos Jabaǵın, opera ánshisi Nematýllo Zkrýllaev, kúıshi Azamat Shynarov, qobyzshy Ásel Raqymjan jáne Ahmet Jubanov atyndaǵy daryndy balalarǵa arnalǵan mektep-ınternatynyń balalar hory oryndady.
Kesh tizginin qolyna alǵan «Qurmet» ordeniniń ıegeri Abylaı Tilepbergen, dırıjerler Nurken Áshirov pen Erlan Dáýrenbekov orkestrge erekshe serpin berip, árbir shyǵarmanyń mazmunyn kórermenge áserli jetkizdi.
– Konsert Ahmet Jubanovqa taǵzym retinde onyń óz repertýarynan bastaldy. Baǵdarlamada kompozıtordyń kúıleri men ánderi, Latıf Hamıdımen birlesip jazǵan operasynan úzindiler Qurmanǵazy atyndaǵy orkestrdiń súıemeldeýimen oryndaldy. Sahnada 80-ge jýyq ártis óner kórsetti, – dedi dırıjer Abylaı Tilepbergen.
Mereıtoılyq is-shara aıasynda Ulttyq ortalyq mýzeıge qarasty Ahmet Jubanov pen Ǵazıza Ahmetqyzynyń memorıaldyq mýzeıinde «Ult rýhyn asqaqtatqan tulǵa» atty mazmundy kórme uıymdastyryldy. Ekspozısııada Ahmet Jubanovtyń ǵumyr joly men shyǵarmashylyq qyzmetinen syr shertetin arhıvtik qujattar, sırek fotosýretter, qoljazbalar, notalyq muralar, kitaptar men jeke zattary jurtshylyq nazaryna usynyldy.
«Ekspozısııa arqyly kompozıtordyń ulttyq mýzyka tarıhyna qosqan ólsheýsiz úlesi tanystyryldy. Kórnekti kompozıtordyń ultqa adal qyzmet etkeniniń dáleli – 1950 jylǵy nemis baspa mashınasy. Bul quralǵa qazaq áripteri engizilgen», – dedi murajaı jetekshisi Ryskúl Saǵatqyzy.
