Bul qoıylym – soǵys pen taǵdyr, úmit pen joǵaltýdyń arasyndaǵy adamdyq dramany názik psıhologııalyq ıirimder arqyly beıneleıtin sahnalyq týyndy. Aıtmatov prozasyna tán ishki tynyshtyq pen jan aıqaıy spektakl boıynan aıqyn sezildi. Ásirese ananyń taǵdyry, kútý men senimniń arasyndaǵy kúı kórermendi beıjaı qaldyrmady.
Qoıylym rejısseri Ǵofýr Mardonovtyń kórkemdik sheshimi men sahnalyq oılaý kókjıegi, ınssenırovka avtory Sardor Hamroevtyń dramatýrgııalyq sheshimi arqyly shyǵarma mazmuny zaman talabyna saı jańasha tynys alyp, adam taǵdyry, soǵys qasireti, ananyń úmiti men rýh kúshi áserli ashyldy.
Ǵofýr Mardonov dramanyń fılosofııalyq salmaǵyn syrtqy effektilermen emes, akterlik ansambldiń tutastyǵy men ishki dramatızm arqyly saraptaýǵa den qoıǵan. Teatr ártisteri de spektaklde jeke daralyqqa emes, ortaq oı men sezimdi jetkizýge umtyldy. Sahnadaǵy árbir qozǵalys, únsizdik pen úzilis – keıipker janyndaǵy tolqynystyń kórinisi. Akterlik ansambldiń tutastyǵy men kásibı sheberligi qoıylymnyń kórkemdik qýatyn arttyryp, kórermen yqylasyna bólendi. Bul – ujym izdenisiniń basty kórkemdik jetistigi.
Iá, «Erte qaıtqan tyrnalar» – sahnadan kóterilgen saǵynyshtyń, úmittiń, adamdyq tózimniń rámizi. Al Káttaqorǵan drama teatry atalǵan týyndy arqyly óz óneriniń bıik deńgeıin, shyǵarmashylyq múmkindigin aıqyn kórsete aldy.
Astana kórermeni spektakldi zor yqylaspen qabyldady. Qoıylym baýyrlas halyqtar arasyndaǵy rýhanı baılanys pen teatrdaǵy shyǵarmashylyq tájirıbe almasýdyń aıqyn mysaly retinde baǵalandy. Al aıtýly óner sapary eki el arasyndaǵy mádenı qarym-qatynasty nyǵaıtyp qana qoımaı, qazaq pen ózbek kórermenine Aıtmatov áleminiń birdeı túsinikti ekenin taǵy bir márte dáleldedi.
