Teńgerimdi baılanys tereńdeı túsedi

M.Áshimbaev meımanǵa iltıpat bildire otyryp, Qazaqstan men Izraıl arasyndaǵy kópjyl­dyq ári kópqyrly yntymaq­tas­tyq júıeli túrde damyp kele jatqanyn atap ótti jáne parla­ment­aralyq ózara is-qımyl­dyń áleýeti zor ekenin tilge tıek etti. Sondaı-aq Senat tóraǵasy Izraıl Prezıdentiniń Astanaǵa jasaıtyn aldaǵy resmı sapary eki el arasyndaǵy yntymaqtas­tyqty odan ári nyǵaıtýǵa tyń serpin beretinine senim bildirdi.

«Qazaqstan men Izraıl arasynda, eń aldymen, joǵary deńgeıde syndarly saıası dıalog ornaǵanyn atap ótken jón. Bıyl qańtar aıynda Memleket basshysy Qasym-Jomart Toqaev Izraıl Premer-mınıstri Bınıamın Netanıahýmen telefon arqyly sóılesti. Áńgime bary­­synda Qazaqstan men Izraıl arasyndaǵy qarym-qatynas­tyń oń dınamıkasy jan-jaq­ty talqylandy. Búginde biz Qazaq­stan Parlamenti men Izraıl Knes­seti arasyndaǵy tyǵyz qarym-qa­tynasty damytýǵa, sondaı-aq, ınnovasııalar, aýyl sharýa­shy­lyǵy men sý resýrstaryn basqarý salalaryndaǵy zańna­ma­lyq tájirıbelerińizdi zerdeleýge múddelimiz», dedi Palata spıkeri.

Sondaı-aq M.Áshimbaev Qazaq­stan Prezıdentiniń Ibrahım kelisimderine qosylý jónin­degi bastamasyna nazar aýdardy. Bul qadam musylman el­deri men Izraıl arasyndaǵy dıplomatııalyq jáne ekonomı­kalyq baılanystardy nyǵaıtýǵa baǵyttalǵan.

«Memleket basshysy Qasym-Jomart Toqaevtyń Qazaqstannyń Ibrahım kelisimderine qosylýy jónindegi bastamasyn Taıaý Shyǵys­ta beıbitshilik ornatý jolyn­daǵy mańyzdy qadam dep esepteımiz. Bul sheshim bizdiń teńgerimdi, syndarly ári beıbitshilikke taban tiregen syrt­qy saıasatymyzǵa tolyq sáıkes keledi. Atalǵan bastama Amerıka Qurama Shtattarymen, Izraıl­men jáne arab elderi­men kópjaqty ózara is-qımyldy nyǵaıtyp, syndarly dıalogke qajetti keńistik qalyptastyrady dep senemin», dedi M.Áshimbaev.

Sonymen qatar Senat tór­aǵasy elimizde júzege asyrylyp jatqan reformalarǵa, onyń ishinde Memleket basshysy Qasym-Jomart Toqaevtyń áleý­met­tik-ekonomıkalyq, saıası bas­tamalarynyń oryndalý barysyna toqtaldy. Atap aıt­qanda, ekonomıkany ártarap­tandyrýǵa, birtutas ári ornyq­ty ulttyq sıfrlyq ekojúıe qalyp­tastyrýǵa baǵyttalǵan sharalar men aldaǵy konstıtýsııalyq reforma máseleleri sóz boldy.

Jalpy kezdesý ótken bul kún Halyqaralyq Holokost qurban­daryn eske alý kúnimen tuspa-tus kelip otyr. Osyǵan baı­la­nysty M.Áshimbaev bola­shaq urpaq úshin gýmanızm men beıbitshilik ıdealdaryn qorǵaý jáne atalǵan qasiretti umytpaý asa mańyzdy ekenin aıtty. Osyǵan baılanysty taraptar rýhanı dıplomatııanyń artyp kele jatqan róli men Álem­­dik jáne dástúrli dinder kósh­bas­shy­­larynyń sezi aıasyn­daǵy ynty­maq­tastyq baǵyttaryn talqylady.

О́z kezeginde Gıdeon Moshe Saar Qasym-Jomart Toqaevtyń basshy­lyǵymen Qazaqstanda júr­gi­zilip jatqan saıası jáne áleý­met­tik-ekonomıkalyq refor­ma­larǵa joǵary baǵa berip, yn­ty­maqtastyqty odan ári keńeı­tip, nyǵaıtýǵa múdde­li ekenin jetkizdi. Infraqury­lym, farmasevtıka, aýyl sharýa­shy­lyǵy, tamaq ónerkásibi, aqparat­tyq tehnologııalar, sıfrlandyrý jáne jasandy ıntellekt salalaryn­daǵy birlesken jobalarǵa da erekshe mán berildi.