Sýret: baq.kz/
Forýmda eldiń ár óńirinen kelgen «Aq jol» partııasynyń 200-ge jýyq kóshbasshy áıeli birigip, elimizdiń qazirgi saıasaty men ekonomıkadaǵy rólin talqylady. Sondaı-aq olar áıelder kásipkerligin qoldaý strategııalaryn ázirlep, áıelderdiń qoǵamdyq-saıası ómirge keńinen qatysatynyn aıtty. Forým aıasynda partııanyń Ulttyq keńesiniń otyrysy da ótti. Onda Ulttyq quryltaıda kóterilgen bastamalarǵa sholý jasalyp, onda aıtylǵan máselelerdiń sheshimin tabýǵa «Aq joldyń» áıelder qaýymy belsene kirispek.
Qazir partııa quramynyń 40 paıyzyn áıelder quraıdy. «Aq jol arýlary» Áıelder qanatynyń tóraıymy, Parlament Májilisiniń vıse-spıkeri Danııa Espaevanyń aıtýynsha, «Aq jol arýlary» forýmy áıelderdi saıasatqa tartyp, qoǵamdyq, ekonomıkalyq turǵyda belsendi bolýǵa shaqyratyn alań. Onda áıel kóshbasshylyǵyna úlken qoldaý kórsetiledi.
«Aq jol» demokratııalyq partııasynyń áıelder qanaty forýmyn mańyzdy saıası qadam retinde qarastyrý kerek. Ol formaldy túrdegi qurylym nemese ımıdjdik joba emes, bul – áıelge degen partııa kózqarasyn bildiredi. Áıelder qanaty da bul – partııamyzdaǵy áıelderdiń Parlamentpen tikeleı dıalog ornatý arnasy, óńirlerden kelip túsetin jáne kúndelikti ómirdegi bastamalardy qalyptastyrý tetigi», dedi D.Espaeva.
Partııa tóraǵasy, Májilis depýtaty Azat Perýashev partııadaǵy áıelderdiń úlesi joǵary ekenin aıtyp: «Qanshama myqty, bilimdi, tájirıbeli er jigitter bolsa, qyzdarymyz odan kem emes. Olardyń ortaq isimizge qosqan úlesi erekshe», dep atap ótti A.Perýashev.
