Foto: Ábil Doshanov (tobolinfo.kz)
Joǵarǵy sottyń málimetinshe, 2021 jyly memlekettik organ JShS-men 2,2 mlrd teńge somasyna bilim berý nysanyn salý jóninde kelisimshart jasaǵan. Qujat boıynsha nysan 2023 jylǵy 31 jeltoqsanǵa deıin paıdalanýǵa berilýi tıis edi, alaıda belgilengen merzimde mektep iske qosylmaǵan.
«2024 jyldyń qańtar aıynda mekteptiń sport zalynda shatyr qulady. Oǵan fermalarǵa túsetin kóldeneń júktemeniń ruqsat etilmegen deńgeıde artýy sebep bolǵan. Bul dáneker tigistiń buzylýyna jáne kótergish konstrýksııalardyń deformasııasyna ákelgen, osylaısha jobalyq qujattama men qurylys normalary buzylǵan», delingen sot málimdemesinde.
«Tobol Info» basylymy jazǵandaı, merdiger jumystardy jylý bolmaǵandyqtan toqtatqan. Ǵımarat sýyq bolǵandyqtan árleý jumystary men jabdyqtardy montajdaýdy jalǵastyrý múmkin bolmaǵan.
Basylym reportajynda 2024 jylǵy 3 qańtarda sport zalyndaǵy baǵanalardyń birine zaqym kelgeni naqtylanady: beton konstrýksııasynyń bir bóligi úgilip, qabyrǵanyń fragmenti julynyp ketkennen keıin shatyrdyń bir bóligi qulaǵan.
Apat saldaryn joıý úshin memlekettik organ avtorlyq jáne tehnıkalyq qadaǵalaýǵa, sondaı-aq qurylysty aıaqtaýǵa 266 mln teńgeden astam somaǵa bólek sharttar jasaǵan. Osy shyǵyndardy tapsyrys berýshi merdigerden zalal retinde óndirip alýdy talap etken.
JShS ókili talappen kelispeı, fermalardyń shamadan tys júktelýi qubyrlardaǵy sýdyń qatyp qalýynan, jylymyq kezinde shatyrdyń sýǵa tolýynan bolǵanyn aıtyp, ınjenerlik jelilerdiń ýaqytyly tartylmaǵany úshin tapsyrys berýshini kinálaýǵa tyrysqan.
Alaıda sot bul ýájderdi qabyldamaı, kelisimshart talaptaryna sáıkes kompanııa jumystardyń sapasyna, qoldanylǵan materıaldarǵa, sondaı-aq qurylystyń jobalyq qujattama men tehnıkalyq talaptarǵa sáıkestigine tolyq jaýapty ekenin atap ótti. Sonymen qatar, JShS konstrýksııalardyń senimdiligi men qaýipsizdigine kepildik bergen jáne shartty tıisinshe oryndamaǵan jaǵdaıda tapsyrys berýshiniń shyǵyndaryn óteýge mindettelgen.
Sot paıdalaný jáne klımattyq faktorlardy merdiger jobalaý men qurylys kezeńiniń ózinde eskerýi tıis ekenin kórsetti. Mundaı mán-jaılar konstrýktıvtik aqaýlar úshin jaýapkershilikten bosatpaıdy.
Talap aryz tolyq kólemde qanaǵattandyrylyp, JShS-ǵa oblystyq bıýdjetke 266 mln teńgeden astam qarajatty – onyń ishinde saraptamalarǵa, apat saldaryn joıýǵa jáne mektep qurylysyn aıaqtaýǵa ketken shyǵyndardy óteý mindetteldi.
Jaýapsyz merdigerdi 135 mıllıon teńge kólemindegi aıyrmany tóleýge mindettedi
Sot sheshimi ázirge zańdy kúshine engen joq.
