Basylymnyń alǵashqy sany Kazmedia Holding kompanııasynyń yjdaǵatymen ótken «Qazaqstan NEXT 2026» forýmynda tanystyryldy. Jıynda bıylǵy jyldyń trendteri men betburysty kezeńderi talqyǵa salyndy. Ǵylym, ekonomıka, saıasat salasynyń bilgirleri eldegi jáne álemdegi jaǵdaılarǵa baǵa berip, tujyrymdy oıyn ortaǵa saldy. Shet elden kelgen pikir kóshbasshylary da aqyl kemesine at baılady. Ár salanyń mamandary bolǵannan keıin, árqaısynyń áńgimesi ár alýan. Biraq sonyń bári jınala kele keleshek kelbetin kórsetetin baıypty boljamdar. Osy sekildi jan-jaqty zerdelengen, eń bastysy kásibı sarapshylardyń maqalalary «Turning points Qazaqstan» jýrnalynda qattalǵan.
Astanalyq oqýshynyń essesi The New York Times basylymynda jarııalandy
Basylymnyń bas dırektory ári kompanııa quryltaıshysy Erkin Jaqypov jýrnaldyń «The New York Times» lısenzııasymen shyǵatynyn málimdedi. Oıly oqyrman habardar bolýy kerek, «The New York Times» – álemdegi eń aýqymdy basylymdardyń biri. Elimizdiń daýysy jahandyq jýrnaldyń platformasynda jańǵyrýy – shyn máninde, úlken jetistik.
«Biz álemdik basylym sarapshylarynyń eksklıýzıv taldaýlary men jergilikti mamandardyń batyl boljamdaryn bir alańda usynyp otyrmyz. «Turning Points Qazaqstan» jýrnaly otandyq medıakeńistikke jańa serpin ákeledi dep senemiz», dedi Erkin Jaqypov.
Teńizdiń dámi – tamshydan. Jaqsy jýrnaldyń salmaǵy mazmunynan kórinip turady. Áýelgi taqyrypta byltyrǵy jyldyń erek oqıǵalaryna sholý jasalǵan. Árimen qaraı jahandyq energetıka, kreatıv ındýstırııa, JI dáýirindegi joǵary bilim, bıznes pen ınvestısııa, álemdik tártip, BUU-nyń jańa saıasaty syndy mańyzy zor taqyryptar oqyrman nazaryna qarmaq salady. Jýrnaldyń tizgin tartar betinde erekshe tájirıbe jasalǵanyn ańǵardyq. «Birinshi betke shyqpaǵan, biraq nazarda bolǵan oqıǵalar» ataýymen aıdarlanǵan bette oqyrman óziniń zerdesin synap kóredi. Test tapsyrmalaryna jaýap bere otyryp, el esindegi eleýli oqıǵalardy qanshalyqty biletinin tekserip kóredi. Bul da jýrnaldyń jasampazdyǵy dep bilemiz.
Jalpy, «Turning Points Qazaqstan» jýrnaly Kazmedia Holding kompanııasynyń alǵashqy ónimi emes. Buǵan deıin kompanııa «National Geographic Qazaqstan» jýrnalyn shyǵaryp, oqyrman yqylasyna bólengen edi. Ol basylym maqalalardyń usynylý dızaıny, mátin tiliniń jatyqtyǵymen erekshelenetin. Bul joly da shyǵarýshylar dástúrden jańylmaǵanyn aıtty. Tusaýy kesilgen jýrnaldyń bas redaktory Aıbyn Shaǵalaq álemdik medıa keńistiktiń baǵyt-baǵdary týraly aıtyp, oǵan qalaı ilesý kerektigi týraly oıyn jetkizdi.
«Sheteldik irgeli gazet-jýrnaldar sala mamandaryna basymdyq beredi. Máseleniń betki qabatyn emes, túpki sheshimin biletin sarapshylardyń pikirin gazetke jarııalaıdy. Álbette, ol óz jumysyn jetik bile otyryp, ony halyqqa túsinikti jetkizýi kerek. Bul úrdisten biz kóp tájirıbe alamyz. Shyǵaryp otyrǵan jýrnalymyz da halyq tanym kókjıegin keńeıtip, salalyq jýrnalıstıkanyń órisin ashady dep esepteımiz», dedi bas redaktor.
