Foto: apkpure.com
Bul jaǵdaı ınvestorlardyń AQSh-taǵy saıası jáne qarjylyq ahýalǵa seniminiń álsireýinen týyndap otyr. Bloomberg esepteıtin Bloomberg Dollar Spot Index bir kúnniń ishinde 0,4% tómendedi. Osylaısha dollar qatarynan tórtinshi kún qatarynan álsirep keledi. Ásirese dollar japon ıenine qatysty qatty arzandaǵany baıqaldy. Naryqta bul úrdis kezdeısoq emes degen pikir basym.
Sarapshylardyń aıtýynsha, dollardyń álsireýine eń aldymen AQSh-taǵy saıasattyń turaqsyz kórinýi áser etip otyr. Investorlar úshin belgisizdik kóbeıgen. Donald Tramptyń Grenlandııaǵa qatysty málimdemeleri, Federaldy rezerv júıesiniń táýelsizdigine qaýip tónýi múmkin degen áńgimeler, bıýdjet tapshylyǵynyń ulǵaıýy men el ishindegi saıası bólinýshilik naryqqa qysym túsirip otyr.
Sonymen qatar naryqta AQSh bıligi japon ıenin qoldaý úshin valıýta naryǵyna aralasýy múmkin degen qaýeset tarady. Buǵan Nıý-Iork Federaldyq rezerv bankiniń qarjy uıymdarymen dollar men ıen baǵamy boıynsha baılanysqa shyǵýy sebep bolǵan. Mundaı áńgimelerdiń ózi ınvestorlardyń dollardan saqtanýyna jetkilikti boldy.
Dollarǵa áser etip otyrǵan taǵy bir mańyzdy másele – Federaldy rezerv júıesi tóraǵasynyń aýysýy. Qazirgi tóraǵa Djerom Paýelldiń ókilettigi 2026 jyldyń mamyrynda aıaqtalady. Naryq qatysýshylary kelesi basshy paıyzdyq mólsherlemeni tómendetýge beıim bolýy múmkin dep qaýiptenip otyr. Bul da dollar úshin jaǵymdy belgi emes.
Budan bólek, AQSh-ta úkimet jumysynyń ýaqytsha toqtap qalý qaýpi de saqtalyp tur. Eger Kongress 30 qańtarǵa deıin memlekettik shyǵystarǵa qatysty zań jobasyn qabyldamasa, elde bıýdjettik daǵdarys týyndaýy múmkin. Mundaı jaǵdaılar ınvestorlardy odan ári alańdatyp otyr.
