О́ńirlik kommýnıkasııalar qyzmeti alańynda Almaty qalasy Bilim basqarmasynyń strategııa jáne kásiptik bilim berý bóliminiń basshysy Erik Ábishaev tehnıkalyq jáne kásiptik bilim berý (TjKB) júıesin memlekettik qoldaý men kolledj ınfraqurylymyn damytý barysy týraly baıandap, bıyl TjKB júıesiniń bıýdjeti 53,3 mlrd teńgeni quraıtyny atap ótti.
Bul tegin bilim alýǵa qoljetimdilikti keńeıtip, stýdentterge áleýmettik qoldaýdy kúsheıtýge múmkindik beredi.
«Tehnıkalyq jáne kásiptik bilim berý salasyndaǵy memlekettik saıasat ár stýdenttiń úı-ishine salmaq salmaı, suranysqa ıe bolyp otyrǵan mamandyqty oqyp, olardyń barynsha bilim alyp, júrip-turýyna qajetti jaǵdaı jasaýǵa baǵyttalǵan», dedi Erik Ábishaev.
Qazir Almatydaǵy 88 kolledjde 86 myńnan astam stýdent bilim alyp jatyr. Olardyń 50 paıyzdan astamy memlekettik bilim berý tapsyrysy aıasynda tegin oqıdy. Byltyr memlekettik tapsyrys boıynsha 17 491 stýdent qabyldanyp, aldynǵy jylmen salystyrǵanda joǵary kórsetkishti kórsetti.
«Bul ár jastyń úı-ishine salmaq salmaı, sapaly kásiptik bilim alýyna naqty múmkindik beretin qadam. Kadr daıarlaý ekonomıkanyń basym salalary boıynsha 131 mamandyq pen 220 biliktilikti qamtıdy, bul jastardyń eńbek naryǵynda suranysqa ıe quzyretterdi meńgerýine jol ashady», dedi spıker.
Kolledjder ınfraqurylymyn damytýǵa da erekshe kóńil bólingen. Byltyr memlekettik kolledjderdi jóndeý men jabdyqtaýǵa jergilikti bıýdjetten 2,4 mlrd teńge bólindi. Áleýmettik áriptesterdiń esebinen tórt kolledjdiń materıaldyq-tehnıkalyq bazasy da 538 mln teńgege jańartyldy.
Almatydaǵy kolledj stýdentteri sondaı-aq shetelde praktıkadan ótip jatyr. Erik Ábishaevtyń aıtýynsha, kolledjder óndiris oryndarymen tyǵyz baılanysyp bilim beredi. Qazir 22 myńnan astam stýdent, ıaǵnı tegin oqıtyndardyń 43,7 paıyzy osy dýaldy oqytý júıesi boıynsha bilim alyp jatyr. Bul modeldi iske asyrý maqsatynda 71 mamandyq boıynsha 770 kásiporynmen kelisimshart jasalǵan.
2025 jyldyń qorytyndysy boıynsha kolledj túlekterin jumysqa ornalastyrý deńgeıi 94,3 paıyzdy qurap, 17 myńnan astam túlek turaqty jumysqa ornalasqan. Sonymen qatar, sheteldik seriktestermen yntymaqtastyq aıasynda Almatynyń alty kolledjinen 110 stýdent Qytaıda, taǵy 16 stýdent Germanııanyń kásiporyndarynda aqyly óndiristik praktıkadan ótip qaıtty.
Sonymen qatar qaladaǵy memlekettik kolledjderde WorldSkills standarttary boıynsha demonstrasııalyq emtıhany engizilgen.
