Elimizdiń astanasymen biteqaınasyp, elordanyń qalyptasý, damý, órkendeý jolynan syr shertip kele jatqan qos basylym byltyr 35 jyldyǵyn atap ótken edi. Qazaq jáne orys tilindegi qos kitap – osy mereıli merekedegi aıshyqty is-sharalardyń jalǵasy ispetti.
Elordanyń tól basylymynyń oqyrmandar úshin orny bólek. Osy ýaqyt ishinde gazet bas shahardyń tynys-tirshiligi men jetken jetistikterin turaqty túrde jarııalaıtyn elorda únine aınaldy.
«Astana aqshamy» gazeti alǵash ret 1990 jyly 13 qazanda «Aqmola aqıqaty» degen ataýmen jaryq kórdi. Bul sol kezeńde óńirdegi alǵashqy qazaqtildi basylymdardyń biri bolatyn. Keıin Aqmolaǵa astana mártebesi berilgen shaqta gazet ataýy «Aqmola aqshamy» bolyp ózgerdi, al 1998 jyldan basylym «Astana aqshamy» degen ataýmen jaryq kóre bastady.
Kitaptyń tanystyrylymynda sóz sóılegen «Elorda Aqparat» medıa seriktestiginiń dırektory Oljas Sydyqbek 2025 jyl «Astana aqshamy» men «Vechernıaıa Astana» gazetterine tabysty bolǵanyna toqtala kelip, bul basylymdar elordalyq qana emes, otandyq jýrnalıstıkanyń da temirqazyǵyna aınalǵanyn atap ótti. «Astana aqshamy» gazeti – jýrnalısterdi tárbıeleıtin naǵyz ustahana. Munda shyńdalǵan talaı jýrnalıst búginde memlekettik basylymdarda, túrli aqparat quraldarynda abyroıly qyzmet atqaryp júr. 2015 jyldan bastap qos basylym medıaholdıngtiń quramyna kirip, zamanaýı aqparattyq ortaǵa beıimdelip jumys istep keledi. Bizdiń basty mıssııamyz – elorda mártebesine laıyq jumys istep, qazirgi medıanyń barlyq talabyna saı bolý», deıdi O.Sydyqbek.
Eki basylymnyń tarıhy qattalǵan jınaqta elordanyń alǵashqy qalyptasý kezeńinen bastap búginge deıingi eleń etkizerlik jańalyqtar men sol kezeńderde jaryq kórgen maqalalar legi toptastyrylypty. Sonymen qatar 35 jyldyń ishinde shejirege aınalǵan aıshyqty oqıǵalar, ár kezeńdegi gazet basshylary men kórnekti qalamgerlerdiń, bilikti avtorlar men oıly oqyrmandardyń estelikteri jaryq kórgen.
Gazet betterinde shyqqan materıaldar jınaqta hronologııalyq tártippen berilipti, oqyrmandar elordada qaı jyldary qandaı oqıǵa bolǵanyn osy derekti jylnama arqyly ońaı taýyp, tarıhı oqıǵalar tizbegine tereń úńile alady.
Mádenı-rýhanı jıynǵa memleket jáne qoǵam qaıratkerleri, tanymal qalamgerler men gazettiń ardager jýrnalısteri qatysyp, «Elimizdegi qalǵymaıtyn qalanyń qazaǵy qolynan tastamaıtyn gazetke aınalsyn» degen aq tilekterin jaýdyrdy.
