«Voice Beyond Horizon» – mýzyka arqyly halyqtardy jaqyndastyryp qana qoımaı, elimizdiń tabıǵı baılyǵy men týrıstik áleýetin álemniń mıllıondaǵan kórermenine tanytatyn aýqymdy mádenı joba. Baǵdarlama Qytaıdyń iri medıaholdıngi «Hunan Broadcasting System» kompanııasymen birlesip daıyndaldy.
Jobanyń basty ereksheligi – túsirilimder túgeldeı elimizdiń týrıstik lokasııalarynda ótti. Atap aıtsaq, Túrkistan, Mańǵystaý, Almaty, Aqmola oblystarynda, sondaı-aq Astana men Almaty syndy aýqymdy alty týrıstik óńirdi qamtydy. Qatysýshylar kóne Túrkistan shaharynyń rýhanı kelbetin, Bozjyra shatqalynyń ǵajaıyp kórinisterin, Kaspıı teńiziniń jaǵalaýyn, tabıǵı injý-marjanǵa balanǵan Qaıyńdy men Kóbeıtuz kólderin, Saty aýyly men Qapshaǵaı sýqoımasyn, sonymen qatar Shortandy-Býrabaı kýrorttyq aımaǵyn aralady.
Baǵdarlamaǵa elimizden bólek, Qytaı, Qyrǵyzstan, Italııa, Malaızııa, Serbııa memleketteriniń ónerpazdary qatysty. О́tken jyldyń qyrkúıek aıynda olar elimizdiń tabıǵaty ásem, tarıhı óńirlerin aralap, 7 myń shaqyrymnan astam jol júrip ótti. Ár sapar mýzyka, tabıǵat hám mádenıettiń úılesken erekshe kórinisine aınaldy.
Aıtýly jobanyń júzege asýyna «Kazakh Tourism» ulttyq kompanııasy, Týrızm jáne sport, Mádenıet jáne aqparat mınıstrlikteri, sondaı-aq Astana, Almaty qalalary men Almaty, Aqmola, Túrkistan, Mańǵystaý oblystarynyń ákimdikteri qoldaý kórsetti. Demeýshiler qatarynda «Qarmet», «Qazaqmys», «Altyn Almas» kompanııalary men Nurlan Smaǵulov qory bar.
Jobanyń resmı kórsetilimi Qytaıda aýdıtorııasy 1,9 mıllıardtan asatyn «Hunan TV» telearnasy men «Mango TV» sıfrlyq platformasynda ótse, baǵdarlamany otandyq kórermen qaýym aqpan aıynda «Qazaqstan» ulttyq telearnasynan tamashalaı alady.
