Saltanatty basqosýǵa memleket jáne qoǵam qaıratkeri Qýanysh Aıtahanov, Májilis depýtaty Qazybek Isa, Mańǵystaý oblystyq máslıhatynyń tóraǵasy Jańbyrbaı Mataev, Syrtqy ister mınıstrligi Halyqaralyq aqparat komıtetiniń tóraǵasy Erlan Jetibaev, Saýd Arabııasynyń Qazaqstandaǵy elshiliginiń hatshysy Ǵassan Ál-Áhmadı, ardager dıplomat, professor, názirtanýshy Saılaý Batyrshauly, basqa da azamattar qatysty.
Memleket basshysy Qasym-Jomart Toqaev onyń kúreskerlik jolyn úlgi ete otyryp: «Ult namysyn bıik ustanǵan Alash alyptarynyń esimderin halqymyz qashanda qurmetpen eske alady. Názir Tórequlov – el jadynda saqtalǵan tulǵalardyń biri, belgili memleket qaıratkeri, qazaqtan shyqqan tuńǵysh kásibı dıplomat», dep oń baǵa bergen edi. О́z kezeginde bul jıyn da osy pikirdi aıqyndaı túsýimen erekshelendi.
Mekteptegi murajaıǵa 40-qa jýyq qundy jádiger qoıylǵan. Onda tarıhı qujattar, sırek kitaptar, kóne buıymdar, Názir Tórequluly týraly eńbekter toptastyrylǵan. Túrkistan oblystyq tarıhı-mádenı-etnografııalyq ortalyqqa qarasty Názir Tórequlov mýzeıiniń «Ult rýhyn kótergen tulǵa: Názir Tórequlov» atty kóshpeli kórmesi, teatrlandyrylǵan ádebı kompozısııa usynyldy. Budan keıin «Názir Tórequluly joly» derekti fılmi kórsetildi. Onyń ssenarııin jazýshy, jýrnalıst Jarylqap Beısenbaıuly men mádenıettanýshy Abylaıhan Qalnazarov jazǵan. Túsirilim tulǵa bıografııasynyń buryn-sońdy qozǵalmaǵan qabaty – túrkilik masshtabtaǵy qaıratkerligi men Alashorda ókilderimen murattastyǵyn kórsetýimen qundy.
Qýanysh Aıtahanuly aıtýly tulǵanyń qaıratkerlik joly, ósken ortasy, azamattyq bolmysyna keńinen toqtaldy. Budan keıin Syrtqy ister mınıstri Ermek Kósherbaevtyń, «Amanat» partııasynyń atqarýshy hatshysy Dáýlet Káribektiń quttyqtaý hattary oqyldy.
«Názir Tórequlov – memlekettiliktiń bıik deńgeıin kórsetip, halyqaralyq arenada qazaq dıplomatııasynyń irgetasyn qalaǵan aıtýly qaıratker. Onyń parasaty men bilimi, el aldyndaǵy jaýapkershiligi men adamdyq aryna adaldyǵy – búgingi jas urpaq úshin naǵyz otansúıgishtiktiń jarqyn úlgisi. Dıplomatııalyq mura retinde Syrtqy ister mınıstrliginde 2003 jyldan beri Názir Tórequlov atyndaǵy arnaıy medalmen eń úzdik dıplomattardyń marapattalýy – qaıratker esiminiń memlekettik deńgeıde qasterlenýiniń dáleli», delingen Syrtqy ister mınıstriniń quttyqtaý hatynda.
Sondaı-aq «Názir Tórequlov» halyqaralyq qorynyń prezıdenti, ekonomıka ǵylymdarynyń doktory, professor Jappar Jumannyń «Názir Tórequlov – reformator, aǵartýshy, ǵalym», belgili jazýshy, qoǵam qaıratkeri, názirtanýshy Joltaı Álmashulynyń «Názir Tóreqululynyń rýhanı murasy», Ulttyq mýzeı dırektorynyń qor qyzmeti jónindegi orynbasary Álibek Kúzerbaevtyń «T.Rysqulov, S.Qojanov, N.Tórequlovtar jerlengen oryn – «Kommýnarka» jóninde» atty baıandamalary tyńdaldy.
Jappar Juman: «О́ziniń qysqa ómirin Názir Tórequlov tolyǵymen ultyna, onyń bolashaǵyna arnady. Túrkistan Ortalyq atqarý komıtetiniń tóraǵasy retinde halqymyzdyń jaǵdaıyn, ál-aýqatyn jaqsartý, olardyń rýhanı mádenıetin arttyrý, mádenıet, bilim oshaqtaryn kóbeıtý, jastardy tárbıeleýdegi eńbegi ushan teńiz. Ol tek qana qazaq halqy emes, búkil túrki tildes halyqtardyń maqtanyshyna aınaldy. О́mir jolynyń barlyq kezeńinde halyqtarmen etene aralasyp, olardy mádenıetke, ádebıetke úndedi», dedi.
«Názir Tórequlov» halyqaralyq qory atalǵan mekteptiń úzdik úsh oqýshysy – Aısana Túkpıeva, Aısáýle Súndetova, Beıbarys Aıtqazınovqa tulǵa atynan shákirtaqy taǵaıyndap, ony arnaıy tapsyrdy, bul úrdis odan ári jalǵasyn tabatyny atap ótildi. Konferensııa sońynda arnaıy qarar qabyldanyp, onda tulǵanyń esimin jańǵyrtý, eline sińirgen eńbegin nasıhattaý maqsatynda aldaǵy ýaqytta qolǵa alynýǵa tıis aýqymdy is-sharalar toptamasy qamtyldy.
