Týǵan topyraqtan túlep ushyp, el yqylasyna bólenip júrgen óner ıeleri bir sahnada bas qosyp, jergilikti jurttyń qulaq quryshyn qandyrdy. Konsert kompozıtor, ánshi Jarylǵapberdi Jumabaıulynyń 175, qazaq hımııasynyń atasy Ábiken Bekturovtyń 125 jyldyǵyna arnaldy.
Kesh barysynda Baıanaýyl eliniń talantty azamattary, ulttyq ónerdiń jarqyn ókilderinen quralǵan «Saryarqa» trıosy án tartý etti. Sondaı-aq Baıanaýyldyń týmasy, respýblıkalyq jáne halyqaralyq baıqaýlardyń laýreaty, Almaty qalasynan arnaıy kelgen Gúlııa Aıdarhanova da keshtiń kórkin asha tústi.
Jarylǵapberdi Jumabaıuly – «Ardaq» «Shama», «Topaıkók» sekildi qaıtalanbas ánderdiń avtory. «Ándi erttep, kúıdi mingen» deıtin jampozdyń naq ózi. Zamanynda ánshi Jarylǵap, balýan Jarylǵap atanǵan. Ánshi bolǵanda asqaqtatyp kótergende aspandaǵy qus qaıyrylǵan ǵalamat daýys ıesi bolǵan ónerpaz. Súıegi Baıanaýlanyń Kúrkeli óńirindegi Jarylǵap qorasy degen jerge jerlengen.
Pavlodar oblysy,
Baıanaýyl aýdany
