Sýretti túsirgen – Erlan OMAR, «EQ»
Memlekettik qoldaýdyń bul túri elimizde 1999 jyly engizilgen. Búginde halyqty áleýmettik qorǵaý júıesiniń mańyzdy bóligi sanalady. Arnaýly memlekettik járdemaqy alýǵa quqyly azamattardyń 17 sanaty zańnamada belgilengen. Tarqatyp aıtsaq, olardyń qatarynda ekinshi dúnıejúzilik soǵys ardagerleri men basqa memleketterdiń aýmaǵynda ótken áskerı is-qımyldarǵa qatysqan ardagerler, soǵys ardagerlerine teńestirilgen azamattar, ekinshi dúnıejúzilik soǵys kezinde qaza tapqan jaýyngerlerdiń áıelderi men qaza tapqan áskerı qyzmetkerlerdiń otbasy músheleri, «Halyq qaharmany», «Qazaqstannyń Eńbek Eri» ataqtaryna ıe bolǵandar, tyl eńbekkerleri, Chernobyl atom elektr stansasyndaǵy apattyń saldaryn joıýǵa qatysqandar, saıası qýǵyn-súrgin qurbandary, múgedektigi bar adamdar, el aldyndaǵy erekshe eńbegi úshin zeınetaqy taǵaıyndalǵan azamattar bar.
Aı saıyn túsetin tólemderdiń mólsheri járdemaqy alatyndardyń sanatyna baılanysty 2,13-ten 138,63 aılyq eseptik kórsetkishke deıin ózgerip otyrady. Arnaýly memlekettik járdemaqy mólsheri jyl saıyn AEK mólsheriniń artýyna baılanysty, respýblıkalyq bıýdjet týraly zańda belgilengen tártippen kóteriledi. Eskeretin jaıt, eger azamat birneshe negizben arnaýly memlekettik járdemaqy alýǵa quqyly bolsa, onda járdemaqy tek olardyń bireýi boıynsha ǵana tólenedi. Bul rette tólem alatyn tulǵanyń óz tańdaýy basshylyqqa alynady. Tańqalarlyǵy, elimizde turaqty turatyn sheteldikter men azamattyǵy joq tulǵalar da el azamattarymen teń dárejede arnaýly memlekettik járdemaqy alýǵa quqyly. Qulaqqaǵys retinde aıtsaq, arnaýly memlekettik járdemaqy taǵaıyndaý úshin ótinishti eGov.kz portaly arqyly nemese halyqqa qyzmet kórsetý ortalyqtaryna baryp toltyrýǵa bolady.
