Áýejaıdyń múmkindigi molaıady

Qazir strategııalyq nysan «Petropavldyń halyqaralyq áýejaıy» dep atalady. Ushý-qoný alańy 10 sm betonmen qaptalyp, uzyn­dy­ǵy 2 800 metr­ge, jalpaqtyǵy 45 metrge de­ıin keńeıdi. Sonymen qatar qoný alańy men men perron halyqaralyq standarttarǵa sáı­kes­tendirilip, jaryqty dabylmen qamtamasyz etilgen.  Sóıtip, qazir áýejaı 171 tonnaǵa deıin júk kótere alatyn ushaqtardy ushyryp-qondyra alady.

Byltyrdan beri «Qazaq Air» avıakompanııasynyń ushaqtary aptasyna 2 ret –  Astanaǵa, al «Scat» kompanııasynyń ushaq­tary aptasyna eki ret Almaty men Shymkent qalalaryna ushyp turdy. Byltyrǵy jazda tipti Mysyrdyń Sharm-ál-Sheıh qala­syna charterlik reıster de uıym­dastyryldy.

Birazdan beri áýejaıdy bas­­­qaratyn kompanııa tabylmaǵan edi. Qazir ony elimizde turatyn túrik azamattary Farrýh pen Sýhrab Mahmýdovtar qurǵan «Orbis Kazakhstan» toby senimdi bas­qa­rý­ǵa alǵan. Kompanııa áýe­jaıdy damytýǵa 1,2 mlrd teńge ınvestısııa quıdy. Qazaqstan ǵana emes, Qyrǵyzstan, О́zbekstan, tipti AQSh naryqtarynda eńbek etetin túrik kompanııasy – qazir elimizdegi ta­bysty kásiporyndardyń qata­ryn­da.

Jýyrda áýejaı dırek­to­­­­­ry­nyń mindetin atqarýshy Ábil Kekilbaev kásiporynnyń «Qyzyljar» arnaıy ekonomıkalyq aıma­ǵyna ótý múmkindigi bar ekenin jarııa­lady. Ol úshin áýejaıdan ar­na­ıy ekonomıkalyq aımaqqa alty shaqyrymdyq temirjol jelisin tartý kerek eken. Bul – «Qyzyljar» AEA kásiporyndardyń alystan keletin qural-saıman­daryn áýejaıdan birden jet­ki­zýge múmkindik beredi. Sondaı-aq AEA aýmaǵynda keıbir ká­siporyn­dardyń júkterin de alys shetelge birden áketýge jol ashady. «AEA aýmaǵyna qosylýymyz bizge salyqtyq jeńildikter alýǵa, ınves­tısııa tartýǵa jaǵdaı jasaıdy», deıdi Á.Kekilbaev.  

Osylaısha, Petropavl áýe­jaıy keńeıip, tabysy mola­ıyp, aımaq­tyń tranzıttik áleýetiniń artýyna úles qospaq. Reseıge jaqyn ornalasýy da bul jobanyń tıimdi iske asyrylýyna múmkindik beredi. Sonymen qatar «Qazposhta» kompanııasymen de kelissózder júrgizilip, qoıma, termınaldar salý máseleleri talqylanyp jatyr.

PETROPAVL