Sýret: primeminister.kz
Vıse-premer atap ótkendeı, jumys toby aýǵan baǵytyndaǵy kelisilgen júıeli jumysty qamtamasyz etýge qurylǵan. Aýǵan tarapymen aǵymdaǵy ózara is-qımyl máselesin úılestirý jumys toby tóraǵasynyń orynbasary – Prezıdenttiń Aýǵanstan boıynsha arnaıy ókili, Syrtqy ister mınıstrliginiń Erekshe tapsyrmalar jónindegi elshisi Erkin Tuqymovqa júkteldi.
Serik Jumanǵarın Memleket basshysy kólik dálizin damytý, ózara saýda-ekonomıkalyq, gýmanıtarlyq is-qımyl boıynsha naqty mindet qoıǵanyn atap ótti. Bul rette aǵymdaǵy qarqyndy jumys vedomstvoaralyq úılestirýdi kúsheıtýdi, bastamalardy neǵurlym tereń pysyqtaýdy talap etedi. Jumys tobynyń negizgi mindeti – birtutas júıeli tásildi qalyptastyryp, artyq bıýrokratııalyq rásimderdi qysqartý. Aýǵanstanmen yntymaqtastyq barynsha tolyq kólemde paıdalanylmaı jatqany atap ótildi. Jumys toby biryńǵaı kelissóz alańyna aınalyp, máselelerdi jedel sheshýge tıis.
Otyrys barysynda kólik jáne logıstıka, energetıka, densaýlyq saqtaý men bilim salasyndaǵy ózara is-qımyl perspektıvasy, sondaı-aq taý-ken metallýrgııa salasyndaǵy birlesken jobalardy júzege asyrý jaıy qaraldy. 2025 jyly Aýǵanstanǵa eki ret gýmanıtarlyq kómek kórsetilgen. Keıingi bes jyldaǵy jetkizgen júkterdiń jalpy kólemi – 6,4 mlrd teńge.
Kólik vıse-mınıstri Jánibek Taıjanov josparly rejimde júzege asyrylyp jatqan Aýǵanstan aýmaǵy arqyly ótetin «Týrgýndı – Gerat – Qandaǵar – Spın – Boldak» temirjol qurylysy jobasynyń (CASA) barysy týraly habardar etti. Qazaqstan tarapy BAÁ-niń Energetıka jáne ınfraqurylym mınıstrligine úshjaqty memorandým jobasyn ázirlep, joldaǵan. Oǵan bıyl aqpanda qol qoıý josparlanyp otyr. Sondaı-aq Pákistan temirjol mınıstrligimen jekeleı memorandýmǵa qol qoıý pysyqtalyp jatyr. Pákistan jaǵy usynylǵan marshrýtty qoldaıdy.
Ǵylym jáne joǵary bilim vıse-mınıstri Gúlzat Kóbenova qazir elimizdiń 34 joǵary oqý ornynda 610 aýǵan stýdenti bilim alyp jatqanyn habarlady. Qazirgi memorandým boıynsha jyl saıyn 30 bilim berý granty bólinedi. Kvotany jylyna 60 grantqa kóbeıtý jaıy qarastyrylyp jatyr.
