Memlekettik kirister komıtetiniń baspasóz qyzmetiniń túsindirýinshe, EAEO erejelerine sáıkes, endi shetelden ınternet arqyly satyp alynǵan barlyq taýarlar jeke paıdalanýǵa arnalǵan kádimgi taýarlar dep sanalmaıdy. Olar «elektrondyq saýda taýarlary» degen jeke sanatqa engizildi. Bul sanat úshin jeke kedendik baj, salyq, bólek kedendik deklarasııa qarastyrylǵan. Elektrondyq saýda taýarlary úshin jańa kedendik baj mólsherlemesi bekitildi.
EAEO elderine taýardy bajsyz ákelý shegi – 200 eýro bolyp qala beredi. Eger taýardyń quny 200 eýroǵa deıin bolsa, kedendik baj da, QQS ta tólenbeıdi. Eger taýardyń quny 200 (118 myń teńge) eýrodan assa, onda satyp alýdyń tolyq somasynan 5% kedendik baj, 16% qosylǵan qun salyǵy (QQS) tólenedi. Buryn baj tek 200 eýrodan asqan bóligine ǵana salynatyn.
Marketpleısterdegi taýarlar men qyzmetterdi bólip tóleý erejesi rettelmek
«Osylaısha, sheteldik ınternet-platformadan quny 200 eýrodan aspaıtyn taýar satyp alǵan jeke tulǵa kedendik baj da, QQS ta tólemeıdi. Al shekten asqan jaǵdaıda 5% baj jáne 16% QQS tólenedi», delingen habarlamada.
Komıtet keıbir taýarlar úshin erekshe mólsherlemeler qoldanylatynyn atap ótti.
Jeńil avtokólikterge baj kádimgi jeke kólikter sııaqty – shyǵarylǵan jyly men qozǵaltqysh kólemine qaraı esepteledi.
Elektromobılderge, motosıklderge, ıahtalarǵa jáne eskek qaıyqtarǵa – 15% baj qoldanylady. Sondaı-aq elektrondyq saýdaǵa jatpaıtyn taýarlar tizimi bar. Olar úshin ádettegi kedendik deklarasııalaý tártibi saqtalady:
- Alkogol ónimderi;
- Temeki;
- Asyl tastar men qymbat metaldar;
Marketpleısterde «Qazaqstanda jasalǵan» dep atalatyn arnaıy bólim ashylady
Buryn shetelden alynǵan ınternet-satyp alýlar jeke paıdalaný taýarlary retinde rásimdeletin. Muny tek qarapaıym tutynýshylar ǵana emes, salyq tólemeı qaıta satý úshin taýar ákelgender de paıdalanǵan. Sonyń saldarynan memleket salyqtan aıyrylyp, al jergilikti satýshylar sheteldik marketpleıstermen salystyrǵanda teń emes jaǵdaıda qalǵan. Jańa erejeler elektrondyq saýda taýarlaryn jeke sanatqa bólip, 200 eýroǵa deıin – salyqsyz, al odan assa – baj ben QQS salý tártibin engizedi.
Qazirgi ýaqytta bul erejelerdiń naqty kúshine ený kúni belgisiz. Vedomstvo málimetinshe, tıisti hattama EAEO-ǵa múshe barlyq elder ishki rásimderdiń aıaqtalǵany týraly habarlama jibergennen keıin ǵana kúshine enedi.
