Buryn «Otbasy banktegi» qaryzdardy ishinara óteý qalaı júzege asyryldy?
Bank klıenti enpf-otbasy.kz platformasyna kirip, «Turǵyn úı qurylys jınaqtary júıesi boıynsha ıpotekalyq qaryzdyń bereshegin ishinara óteý» maqsatyn tańdaıtyn. О́tinim rásimdelgen soń, zeınetaqy qoryndaǵy artyq jınaqtardy paıdalanýǵa suraý salynatyn Biryńǵaı jınaqtaýshy zeınetaqy qory (BJZQ) ótinimdi 5 jumys kúni ishinde qarap, zeınetaqy jınaqtarynyń artyǵy bolǵan jaǵdaıda, birjolǵy zeınetaqy tólemi (BZT) somasyn «Otbasy banktegi» arnaıy shotqa aýdaratyn.
Qarajat túskennen keıin klıent ony 20 jumys kúni ishinde paıdalanýy tıis bolǵan. Ádette, qaryzdy ishinara merziminen buryn óteý rásimi kezekti nesıe tólemi jasalatyn kúni iske qosylatyn. Sonyń nátıjesinde qaryz boıynsha aı saıynǵy tólem óteletin.
Tis emdeý úshin zeınetaqy jınaqtaryn paıdalanýǵa shekteý qoıyldy
Nesıe boıynsha aı saıynǵy tólem birneshe bólikten turady:
- negizgi qaryzdan – bul banktiń turǵyn úı satyp alý úshin klıentke bergen qarajaty;
- banktiń syıaqysynan – turǵyn úı satyp alýǵa berilgen qarajatty paıdalanǵany úshin esepteletin paıyzdar;
- múmkin bolatyn merzimi ótken bereshek pen ósimpuldardan – tólem ýaqytynda jasalmaǵan jaǵdaıda esepteledi;
- keıinge qaldyrylǵan tólemderden – eger qaryz qaıta qurylymdalǵan bolsa;
- depozıttegi jınaqtardan – aldyn ala qaryz berilgen jaǵdaıda.
Qandaı ózgerister engizildi?
Turǵyn úı jaǵdaıyn jaqsartý úshin birjolǵy zeınetaqy tólemderin paıdalaný qaǵıdalarynda «bereshek» uǵymy «negizgi qaryz» uǵymymen almastyryldy.
Bul degenimiz, endi zeınetaqy jınaqtarynyń artyǵyn paıdalana otyryp, nesıe boıynsha ishinara nemese tolyq merziminen buryn óteý kezinde tek negizgi qaryzdy ǵana tóleýge bolady. Birjolǵy zeınetaqy tólemi esebinen aı saıynǵy tólemdi tolyq jabýǵa bolmaıdy.
Zeınetaqy jınaǵyn turǵyn úı satyp alýǵa paıdalaný tártibi ózgertildi
Nesıe boıynsha syıaqy (paıyzdar) jáne aı saıynǵy tólem quramyna kiretin basqa da ilespe tólemderdi qaryz alýshy óz qarajaty esebinen tóleýi tıis.
Endi «Otbasy banktegi» qaryzdardy ishinara jáne tolyq óteý qalaı júzege asyrylady?
Jańa talaptardyń engizilýine baılanysty «Otbasy banktegi» qaryzdardy ishinara nemese tolyq óteý prosesin qaıta beıimdeý qajet. Bul belgili bir ýaqytty talap etedi.
Aldaǵy ýaqytta bul operasııa eki kezeńnen turatyn bolady:
- aldymen nesıe boıynsha syıaqy jáne basqa da ilespe tólemder qaryz alýshynyń óz qarajaty esebinen tólenedi;
- sodan keıin negizgi qaryz zeınetaqy jınaqtarynyń artyǵy esebinen óteledi.
Osyǵan baılanysty «Otbasy banktegi» aǵymdaǵy jáne arnaıy shottarda qajetti qarajattyń aldyn ala bolýyn qamtamasyz etý qajet.
«Qashyqtan kórsetiletin qyzmetterdi,mobıldi qosymshany jáne otbasybank.kz saıtyndaǵy jeke kabınetti jańa talaptarǵa beıimdeý maqsatynda Otbasy bank birjolǵy zeınetaqy tólemderin paıdalana otyryp, qaryzdardy ishinara nemese tolyq óteýge arnalǵan ótinimderdi qabyldaýdy ýaqytsha toqtatýǵa májbúr», dep túsindirdi banktiń baspasóz qyzmeti.
Sondyqtan enpf-otbasy.kz platformasynda ótinimderdi qabyldaý 2026 jyldyń 30 qańtarynan 31 qańtaryna qaraǵan túnnen bastap 2026 jyldyń 2 naýryzyna deıin toqtatylady.
Al 2026 jyldyń 30 qańtaryn qosa alǵanǵa deıin berilgen ótinimder burynǵy erejelerge sáıkes qaralady.
«Jańa erejelerge sáıkes, klıent aldymen óz qarajaty esebinen aǵymdaǵy shotta nesıe boıynsha syıaqyny jáne depozıtke mindetti jarnany qamtamasyz etýi tıis. Tek sodan keıin ǵana ol 200 000 teńge mólsherindegi birjolǵy zeınetaqy tólemi esebinen negizgi qaryzdy óteı alady», delingen bank taratqan habarlamada.
