«Zań jáne shabyt: taǵdyrdy aıqyndaıtyn tańdaý» taqyrybyndaǵy sharanyń mańyzy zor. Astana qalalyq Bilim basqarmasynyń qoldaýymen elordadaǵy Psıhologııalyq qoldaý ortalyǵy men Baıqońyr aýdanynyń prokýratýrasy birlesip uıymdastyrdy.
«Kezdesýdiń maqsaty – árbir oqýshynyń is-áreketi bolashaqta óz taǵdyryna áser etetinin kórsetý, zańdy túsindirý. Zań boıynsha qylmystyq jaýapkershilik 16 jastan bastalady. Qylmystyq kodekste asa aýyr qylmys jasaǵany úshin (onyń ishinde adam óltirý boıynsha) 14 jastan bastap jaýapkershilikke tartylady. Máselen, urlyq jasaǵany úshin 3 jylǵa deıin bas bostandyǵynan aıyrý bolmasa shekteý jazasy, alaıaqtyq babymen 2 jylǵa deıin bas bostandyǵynan aıyrý nemese shekteý jazasy kózdelgen. Bir qylmys jasaǵany úshin 5 jyldan 8 jylǵa deıin temir torda otyrý ońaı emes. Sol úshin ár áreketti jasamas buryn aldymen san ret oılanǵan jón. Bastysy kúmándi áreketten aýlaq bolyńyzdar. Biz óz tarapymyzdan qylmys jasamaýǵa, zańǵa baǵynýǵa shaqyramyz», dedi Baıqońyr aýdany prokýratýrasy Qylmystyq qýdalaý bóliminiń basshysy Muhtar О́serhan.
Byltyr «Baıqońyr» aýdanynda kámeletke tolmaǵandar arasynda 36 qylmystyq is qozǵalǵan. Olardyń ishinde 11is – urlyq, 14 is – alaıaqtyq, qalǵany usaq qylmys.
Zań men tártip – memlekettik saıasattyń basty qaǵıdaty
«Búgingi is-shara jasóspirimderdiń quqyqtyq saýattylyǵyn arttyrýdy, erte kásiptik baǵdar berý, mamandyq tańdaý, óz bolashaǵyna qatysty ómirlik mańyzdy sheshimderdi qabyldaýda jaýapty ári sanaly kózqaras qalyptastyrýǵa úndeıdi. Ásirese erekshe nazar jeke motıvasııaǵa jáne óz bolashaǵy úshin jaýapkershilikke aýdaryldy. Kezdesý barysynda astanalyq oqýshylarǵa «Ánshi» fılmi kórsetildi. Onyń ıdeıasy – pozıtıvti baǵdar qalyptastyrýǵa, ózin-ózi kórsetýge, ómirlik joldy sanaly túrde durys tańdaýǵa baǵdar beredi», dedi Astana qalasy Bilim basqarmasy Qosymsha bilim berý jáne tárbıe bóliminiń basshysy Sultan Imanjan.
Jıynda sóz sóılegen spıkerler oqýshylarǵa ońaı jolmen aqsha tabýdyń saldaryn túsindirip, aqyl-keńesin berdi. Psıholog Gúlmıra Qapanova mektep oqýshylaryna albyrttyqpen, erkelikpen, aǵattyqpen jasaǵan oǵash árekettiń aqyry ómir boıy opynýǵa ákeletinin túsindirdi. №119 mekteptiń dırektory Gúljan Jıenıqyzy zań men tártip qaǵıdatyn jan jaqty saralap, uǵyndyrǵan qonaqtarǵa alǵysyn jetkizip, mundaı ilkimdi kezdesýdiń mańyzy joǵary ekenin aıtty.
Kezdesý aıasynda mektep oqýshylary «Q-Arts Production» prodıýserlik ortalyǵynyń demeýimen jasóspirimderdiń ózderi túsirgen «Ánshi» fılmin tamashalady. Fılmniń ıdeıasy pozıtıvti baǵdar qalyptastyryp, durys joldy tańdap, ishki qalaýynyń oryndalýy árkimniń óz qolynda ekendigin uǵyndyrady.
