Moonshot AI ázirlegen Kimi K2.5 bastapqyda mýltımodaldy JI retinde jasalǵan. Model shamamen 15 trln vızýaldy-mátindik token negizinde qaıta daıarlanǵan, bul rette «kórý» jáne «mátin» dep bólinetin jeke paıplaındar qoldanylmaǵan. Mundaı tásil ártúrli derek túrlerin bir kontekste qatar óńdeýge múmkindik beredi.
Cybernet AI túrki tilderine arnalǵan eń iri jasandy ıntellekt modelin tanystyrdy
Jańa JI-modeldiń múmkindikteri aýqymdy. Ol tek mátindi emes, sýret pen vıdeony da tereń túsinedi. Baǵdarlamalaý salasynda da áleýeti joǵary: skrınshot, ekran jazbasy nemese dızaın úlgileri arqyly kod jaza alady. Sonymen qatar saıttar men qosymshalardyń ınterfeısterin beıne nemese sýretke qarap qaıta jasap shyǵarý qabiletine ıe. Júıe bir mezette 100 JI-agentten turatyn topty basqaryp, 1 500-ge deıin qural shaqyrýyn oryndaı alady.
Testileý nátıjeleri de nazar aýdartady. Baǵdarlamalaý boıynsha benchmark synaqtarynda Kimi K2.5 Gemini 3 Pro jáne GPT-5.2 júıelerinen joǵary ball jınaǵan. Vıdeo taldaý tapsyrmalarynda Claude Opus modelinen ozyq nátıje kórsetken. Al agenttik ssenarıılerde tapsyrmalardy oryndaý jyldamdyǵy jekelegen JI qoldanýmen salystyrǵanda 4,5 esege deıin artqan.
Jańa modelmen birge Moonshot AI ázirleýshilerge arnalǵan Kimi Code quralyn da usyndy. Bul kodpen tikeleı termınal arqyly nemese VS Code, Cursor sekildi redaktorlarda jumys isteýge múmkindik beredi. Kompanııa ony Claude Code pen Gemini CLI-ge ashyq balama retinde usynyp otyr.
Aıta keteıik, Moonshot AI birneshe mıllıard dollar ınvestısııa tartqan. Qazir startap jańa ınvestısııalyq raýndqa daıyndalyp jatyr, al kompanııanyń baǵalanýy 5 mlrd dollarǵa jýyq. Sarapshylardyń pikirinshe, Kimi K2.5-tiń ashyq formatta usynylýy jahandyq jasandy ıntellekt naryǵyndaǵy básekeni kúsheıte túsýi yqtımal.
Budan ilgerirekte Beıjińniń eki jylda jasandy ıntellektiniń astanasyna aınalýǵa nıetti ekenin jazǵan edik.
