Foto: pinterest.com
Másele Premer-mınıstr Oljas Bektenov ótkizgen Sheteldik ınvestorlar keńesiniń aralyq otyrysynda qaraldy. Jıynda densaýlyq saqtaý mınıstri Aqmaral Álnazarova salany damytý boıynsha atqarylyp jatqan jumystar týraly baıandady.
Dári-dármekter men medısınalyq qyzmetterdiń tizbesi QQS-tan bosatyldy
Mınıstrdiń aıtýynsha, uzaqmerzimdi demografııalyq boljamdar men aldaǵy 10-15 jylda elde dárilik zattarǵa suranys kólemin eskere otyryp, ınvestorlarmen birlesken jańa tetikter ázirlengen. Sonyń nátıjesinde ınvestısııalar týraly kelisimderdiń jańartylǵan formaty engizilip, ol salyqtyq jáne kedendik jeńildiktermen qatar ınfraqurylymdyq qoldaýdy jáne ónimdi ótkizýdiń uzaqmerzimdi kepildikterin qamtıdy.
«Búginde Úkimet otyrysynda jalpy quny 620 mln AQSh dollaryn nemese 316 mlrd teńgeni quraıtyn 6 ınvestısııalyq joba maquldandy. Bul, eń aldymen, Qazaqstannyń dári-dármekpen qamtýdaǵy derbestigin kúsheıtýge baǵyttalǵan qadam. Aldaǵy 2-4 jylda elimizde 400-den astam jańa dárilik zattar óndiriledi», dedi Aqmaral Álnazarova.
Sondaı-aq sońǵy eki jylda farmasevtıka salasyna tartylǵan ınvestısııa kólemi aıtarlyqtaı óskeni atap ótildi. Bul kórsetkish 47 mln dollardan 87 mln dollarǵa deıin, ıaǵnı eki esege jýyq artqan. Jańa jobalar aıasynda myńnan astam jańa jumys ornyn ashý kózdelip otyr.
Saladaǵy júıeli jumystar farmasevtıkalyq jáne medısınalyq ónerkásipti damytýdyń 2030 jylǵa deıingi tujyrymdamasy sheńberinde jalǵasyn tabady. Búginde Qazaqstanda farmasevtıka úshin kadr daıarlaýdyń tolyqqandy júıesi qalyptasqan. Bul baǵytta memlekettik qoldaý kórsetilip, dýaldy bilim berý tetikterin damytýǵa erekshe mán berilip otyr.
Jańa 4 farmasevtıkalyq zaýyt salynady: Elimizde qandaı dári-dármekter óndiriledi?
Budan bólek, 1 qańtardan bastap tegin medısınalyq kómektiń kepildendirilgen kólemi jáne MÁMS aıasynda dári-dármekter men medısınalyq qyzmetterdi ımporttaý jáne ótkizý qosylǵan qun salyǵynan bosatyldy. Sonymen qatar jalǵan preparattardyń aınalymyna baqylaýdy kúsheıtý jáne jaýapkershilikti arttyrýǵa baǵyttalǵan zańnamalyq túzetýler ázirlengen. Bul sharalar ishki naryqty qorǵap, sapaly ári qaýipsiz dári-dármekpen qamtamasyz etýge múkindik beredi.
