Osy kúnderi Astana qalasynyń emhanalarynda erte shaqtaǵy balalarmen jumys isteıtin medısınalyq-sanıtarııalyq alǵashqy kómek uıymdarynyń 60 mamany úshin Bala damýyn monıtorıngteýdiń halyqaralyq nusqaýlyǵy boıynsha alǵashqy trenıng bastaldy.
30 qańtardan bastap ár balaǵa shamamen 130 dollar aýdarylady
Qatysýshylardyń arasynda tájirıbeli dárigerler men elimizdegi barlyq medısınalyq joǵary oqý oryndarynyń oqytýshylary bar. Alda osyndaı trenıngter elimizdiń barlyq óńirlerinde ótip, Bala damýyn monıtorıngteýdiń halyqaralyq nusqaýlyǵy ulttyq deńgeıde qoljetimdi bolady. Bul jumystardyń barlyǵy Úkimet bıyl bekitken «Sátti Bastaý» erte damý jáne erte aralasý jónindegi keshendi jospar men «Qazaqstan balalary» tujyrymdamasy sheńberinde iske asa bastady.
Damýynda kedergi bar balany erte anyqtaý men erte aralasý – birinshi kezek múgedektiktiń aldyn alady. Osylaısha, 6 jasqa deıingi árbir balanyń (2,3 mıllıonnan astam búldirshin) óz áleýetin tolyq ashýǵa múmkindik beredi. Kópjyldyq zertteýler negizinde ázirlengen Bala damýyn monıtorıngteýdiń halyqaralyq nusqaýlyǵy búldirshin damýyndaǵy qıyndyqtardy anyqtaýmen qatar, onyń myqty tustaryna nazar aýdarady, otbasylardy qoldaýǵa baǵyttalǵan tıimdi sheshimderdi usynady.
Búginde el boıynsha medısınalyq-sanıtarııalyq alǵashqy kómek uıymdarynyń janynan 336 damý jáne erte aralasý ortalyǵy ashylǵan. Bul ortalyqtarda otbasylar jan-jaqty qoldaý tabady. О́z kezeginde ata-analar da keri baılanys arqyly ortalyqtardyń jumysyn jetildirýge atsalysyp, balalarǵa kórsetiletin kómektiń tıimdiligin arttyrýǵa úles qosyp keledi.
