Ortalyqta 18 jastan asqan, psıhonevrologııalyq aýrýlary bar, I, II toptaǵy múgedektigi bar qyzmet alýshylarǵa stasıonarlyq jaǵdaıda arnaýly áleýmettik qyzmet kórsetiledi. Buǵan deıin mekeme aýmaǵynda 1964, 1970 jyldary salynǵan eki korpýs jumys istep turǵan edi. Endi, mine, zaman talabyna saı jańa ǵımarat iske qosylyp otyr.
Qosymsha korpýstyń jalpy aýmaǵy 6 281,8 sharshy metrdi quraıdy. Nysan halyqty áleýmettik qorǵaý salasyndaǵy arnaýly áleýmettik qyzmetter kórsetý standarttaryna tolyq sáıkes keledi. Ǵımaratta arnaıy eńbek sheberhanasy, medısınalyq kabınetter, zamanaýı ashana, shashtaraz bólmesi, kitaphana, jatyn bólmeleri qarastyrylǵan.
Ǵımarattyń ashylý saltanatyna oblys ákimi Berik Ýálı men oblys prokýrory Erlan Abaev qatysty. О́ńir basshysy jańa nysannyń áleýmettik mańyzyna toqtalyp, mekeme erekshe kútimdi qajet etetin azamattarǵa qolaıly ári qaýipsiz orta qalyptastyrýǵa baǵyttalǵanyn atap ótti.
– Memleket basshysy Qasym-Jomart Toqaev Qazaqstan halqyna Joldaýynda: «Memleket ár azamattyń laıyqty tabys taýyp, sapaly áleýmettik qyzmet alyp, erteńgi kúnine senimdi bolýy úshin barynsha jaǵdaı jasaı beredi», dep áleýmettik salanyń mańyzyn aıryqsha atap ótti. Jańa ǵımaratty paıdalanýǵa berý – halyqty áleýmettik qorǵaý salasynda arnaýly áleýmettik qyzmetter kórsetý standarttaryna saı, qyzmet alýshylardy bir adamǵa 5 sharshy metrge deıingi turǵyn úı alańymen qamtamasyz etýge múmkindik beredi. Sonymen qatar qosymsha korpýs sanıtarlyq-gıgıenalyq, epıdemııaǵa qarsy talaptardyń saqtalýyn qamtamasyz etedi. Sondaı-aq qyzmet alýshylarǵa da, ortalyq personalynyń jumysyna da neǵurlym qolaıly jaǵdaılar jasap, medısınalyq, áleýmettik qyzmet kórsetý sapasyn arttyrady. Oblysymyzda zańsyz shyǵarylǵan aktıvterdi qaıtarý esebinen 25 nysannyń qurylysy bastalǵan. Búginde úsheýiniń qurylysy aıaqtaldy. 22 nysannyń qurylysy júrgizilip jatyr. Jalpy, bul maqsatqa 22 mlrd teńge qarjy qarastyryldy. Osy ıgi ispen aınalysqan prokýratýra, quqyq qorǵaý organdary qyzmetkerlerine Abaı oblysy jurtshylyǵy atynan alǵysymyzdy bildiremiz, – dedi oblys ákimi.
Ákimdiktiń dereginshe, nysan iske qosylǵannan keıin jańa jumys oryndary ashylyp, óńirdegi áleýmettik qoldaýǵa muqtaj azamattarǵa sapaly qyzmet kórsetiledi. Jalpy, óńirde 23 800 múgedektigi bar adam tirkelgen. Osy jyly aımaqtaǵy 15 myńnan astam múgedektigi bar jandy tehnıkalyq ońaltý quraldarymen, ońaltý qyzmetterimen qamtamasyz etý maqsatynda 3,3 mlrd teńge bólindi. Sonymen qatar áleýmettik, kólik ınfraqurylymy nysandarynyń qoljetimdiligin qamtamasyz etý maqsatynda bıyl 200 nysandy beıimdeýden ótkizý josparlanyp otyr. Oblysta arnaýly áleýmettik qyzmettermen 6 myńǵa jýyq adam qamtylǵan.
Oblys ákimi baspasóz qyzmetiniń habarlaýynsha, Memleket basshysynyń tapsyrmasyn oryndaý maqsatynda Úrjarda balalarǵa arnalǵan arnaýly áleýmettik qyzmet kórsetý ortalyǵynyń janynda salynǵan qosymsha ǵımarattyń qurylysy aıaqtalyp, bıyl paıdalanýǵa beriledi. Sondaı-aq Borodýlıha aýdanynda, Semeı qalasynda ornalasqan qarttar úıine aǵymdaǵy jóndeý jumystary júrgiziledi. Áleýmettik mekemelerdiń qyzmetin arttyrý maqsatynda 20 avtokólikti (onyń ishinde 7 ınvataksı) lızıng arqyly satyp alý josparlanǵan.
Abaı oblysy
