Oblystyq aýyl sharýashylyǵy basqarmasynyń basshysy Ábdirásil Jeleýbaevtyń aıtýynsha, jóndeý jumysy júrgiziletin kanaldardyń jalpy sýarý alańy 51,4 myń gektardy quraıdy eken. Alqaptarǵa sý jetkizý múmkindiginiń shekteýli bolýyna baılanysty sýarmaly egistik kólemi qysqartylmaq.
«2026 jyly egis alqaptarynyń jalpy kólemi ótken jylmen salystyrǵanda 16,7 myń gektarǵa azaıyp, 623,3 myń gektarǵa aýyl sharýashylyǵy daqyldaryn egý josparlanýda. Bul rette egis alqaptarynyń qurylymyn ártaraptandyrýǵa erekshe kóńil bólinip, sýdy az qajet etetin daqyldarǵa basymdyq beriledi», deıdi basqarma basshysy.
