Sıfrlyq kodekske sáıkes, bıometrııalyq derekterdi mindetti túrde qoldaný tek zańda tikeleı kórsetilgen jaǵdaılarda ǵana múmkin. Eger mundaı mindet zań deńgeıinde bekitilmese, bıometrııalyq derekterdi jınaý men paıdalaný tek azamattyń erikti kelisimimen júzege asýǵa tıis. Sebebi bıometrııalyq aqparat jeke derekterdiń erekshe sanatyna jatady jáne ony qoldaný kezinde kelisimge qatysty barlyq zańdy rásimder tolyq saqtalýy qajet.
Májilis depýtaty Ekaterına Smyshlıaevanyń sózinshe, qazirgi tájirıbede bıometrııalyq derekterdiń azamattyń kelisiminsiz nemese zńda kózdelmegen jaǵdaıda májbúrli túrde qoldanylyp jatqan mysaldary kezdesedi.
«Jańa kodeks dál osyndaı olqylyqtardy joıýǵa baǵyttalǵan. Eger bıometrııalyq ıdentıfıkasııany paıdalaný zańmen mindettelse, ol tek memlekettik bıometrııalyq júıeler arqyly júzege asyrylady. Búginde mundaı júıeler Ulttyq banktiń bank jáne qarjy sektoryna arnalǵan bıometrııalyq júıesi men sıfrlyq úkimet aıasynda jumys isteıtin ýákiletti memlekettik organnyń bıometrııalyq platformasy arqyly qamtamasyz etiledi. Bul jaǵdaıda bıometrııalyq derekterdiń qaýipsizdigine memleket tikeleı jaýap beredi. Al zańmen mindettelmegen barlyq ózge jaǵdaılarda bıometrııany qoldaný tolyqtaı erikti sıpatta bolady», deıdi depýtat.
