Atalǵan derekter Qazaqstandaǵy jasandy ıntellekt naryǵyna arnalǵan alǵashqy keshendi taldaý – «Kazakhstan AI Country Report» esebinde usynyldy. Esepke sáıkes, elimiz sıfrlandyrý kezeńinen ótip, jasandy ıntellektini júıeli ári aýqymdy túrde engizý kezeńine qadam basyp otyr. JI eldiń ekonomıkalyq ósimin jedeldetetin jáne halyqaralyq básekege qabilettiligin arttyratyn mańyzdy faktor retinde qarastyrylady.
Zertteý avtorlarynyń baǵalaýynsha, jasandy ıntellekt tehnologııalaryn engizý orta merzimdi perspektıvada jumys oryndarynyń jartysynan astamynda eńbek ónimdiligin arttyryp, elimizdiń jalpy ishki óniminiń jyl saıyn qosymsha 0,5–2 paıyzǵa ósýin qamtamasyz ete alady. Esepte kórsetilgendeı, otandyq JI-startaptardyń basym bóligi qoldanbaly B2B-sheshimderge baǵyttalǵan. Olar ishki naryqpen qatar, halyqaralyq naryqtarda da belsendi jumys isteıdi. Jobalardyń eń joǵary shoǵyrlanýy «Enterprise AI», bıznes-prosesterdi avtomattandyrý, Indýstrııa 4.0, «MarTech», «EdTech», «MedTech» baǵyttarynda baıqalady.
2025 jyl jasandy ıntellekt ekojúıesi úshin betburys kezeńi boldy. Osy jyly elimizde naryq baǵalaýy 1 mlrd AQSh dollarynan asatyn alǵashqy jeke tehnologııalyq kompanııa – «Higgsfield AI» paıda boldy. Sonymen qatar, «Bridge jáne «Series A» kezeńderinde elimiz úshin eń iri ınvestısııalyq mámileler tirkeldi. Bul otandyq kásipkerler negizin qalaǵan jasandy ıntellekt kompanııalarynyń halyqaralyq iri ınvestorlardan kapıtal tartý múmkindigi joǵary ekenin kórsetti.
