«Zań jáne tártip» aılyǵy aıasynda uıymdastyrylǵan teatr festıvalinde sahna óneri arqyly oqýshylar búgingi kúnniń ózekti máselesin dál beınelep berdi. «Tártip pen jaýapkershilik» ataýymen ótken teatr festıvaline mektep ujymy, oqýshylar, soymen qatar ata-analar, arnaıy Is-sharaǵa «Egemen Qazaqstan» gazetiniń tilshisi Qýanysh Nurdanbekuly men Baıqońyr aýdany boıynsha kámeletke tolmaǵandar isi jónindegi ınspektor Symbat Rahmanbetqyzy qatysyp, tárbıelik máni zor oılarymen bólisti.
Sondaı-aq festıvaldiń joǵary deńgeıde ótýine «Úıde» jastar áleýmettik jobasynyń negizin qalaýshy, Ishki ister mınıstrligi janyndaǵy esirtki qylmysynyń aldyn alý jónindegi keńes múshesi Saıat Jarmuhanbetuly atsalysyp, jastarǵa baǵyt-baǵdar beretin mazmundy pikirler aıtty.
Festıval shymyldyǵy «Sát» bı tobynyń «Qazaq» bıimen ashylyp, ulttyq rýh pen sahna mádenıetiniń úılesimin kórsetti. Kórermender nazaryna «Street Soul» komandasy «Otkrytıe» bıin usynyp, keshtiń shyraıyn asha tústi. 6 «Z» synyp oqýshylary Karımova Aılın men Bralınova Dılnaz óner kórsetse, 5 «V» synyp oqýshylary Qaısar Aısaný men Kamalı Aıalý dzıýdo jattyǵýlaryn oryndap, kórermenniń ystyq yqylasyna bólendi.
Teatrlandyrylǵan qoıylymdar da kórermendi tereń oıǵa jeteledi. «Asyl» komandasy «Novaıa odnoklassnısa» qoıylymy arqyly mekteptegi qarym-qatynas pen túsinistiktiń mańyzyn kórsetti. «Vtoroı shans» komandasy «Tam, gde ne hvatalo mamy» qoıylymynda otbasy jylýy men ata-ananyń ornyn eshnárse almastyra almaıtynyn áserli jetkizdi. Al «Shabyt» komandasy «Ata-analarmen qaqtyǵystar: nege bizdi estimeıdi?» qoıylymy arqyly jasóspirimder men ata-analar arasyndaǵy túsinispeýshilik máselesin shynaıy beıneledi. «Arys» komandasy «Veshestva ı lýdomanııa» taqyrybyndaǵy qoıylymymen zııandy ádetterdiń adam ómirine tıgizer aýyr saldaryn kórkem túrde kórsete bildi.
Festıval barysynda 5 «L» synyp oqýshysy Haırýddın Alııa «Taý ishinde» ánin oryndap, kópshilikti baýrasa, «Aqjeleń» dombyrashylar ansambli Ulan Bakıjanovtyń «Esil-Nura» kúıin oryndap, ulttyq ónerdiń bıik deńgeıin pash etti. Mádenı, rýhanı shara oqýshylardyń akterlik qabiletin ǵana emes, olardyń ómirge kózqarasyn, zań men tártipke baǵynýdyń mańyzy joǵary ekenin aıqyndaı tústi. Sahnadaǵy ár qoıylym – búgingi qoǵamdaǵy ózekti máselelerdiń kórkem kórinisindeı áser etti.
