Qazaqstannyń eńbek sińirgen qaıratkeri, pýblısıst-jazýshy Sharhan Qazyǵul esimi kópshilikke «Álem áınegindegi ásemdik», «Dúbára dúnıe», «Toǵyz taraý týyndy», «Ońashadaǵy onlaın oılar», «Palıtrasyz portretter», «Fýtbol fılosofııasynyń fragmentteri» sekildi pýblısıstıkalyq kitaptarymen, sondaı-aq «Mesenat» ádebı baıqaýyn jeńip alǵan «Kúlpet» atty romanymen jaqsy tanys. Endi, mine, qalamger «Segizinshi nota» atty kezekti kitabymen mazmundyq turǵydan jańa beleske kóterilip otyr.
Jınaqqa bılik, ádebıet, óner jáne jýrnalıstıka salasyndaǵy tanymal tulǵalar týraly portrettik esseler men pýblısıstıkalyq tolǵamdar enipti. Máselen, ádebıetimizdiń klassıkteri Ákim Tarazı men Ábdijámil Nurpeıisovter týraly «Tasjarǵan Tarazı» men «Sanadaǵy sarytap saǵynysh», Abaı men Muqaǵalı syndy aqyndardy orys tiline aýdarǵan, televızııa men kósemsózdiń maıtalmany, memleket jáne qoǵam qaıratkeri Ǵadilbek Shalahmetov týraly «Shalahmetov sheńberindegi shtrıhtar», belgili kompozıtor Tólegen Muhamedjanov týraly «Segizinshi nota» syndy birneshe essesin oqyǵanda qalamgerdiń belgili bir tulǵanyń ómirbaıandyq derekterin tizbektemeı, ár keıipkerdiń bolmys-bitimin zamannyń tynysymen astastyra áńgimeleıtinin ańǵardyq. Bizdiń paıymdaýymyzsha, «Segizinshi nota» kitaby jatyq til, dál detal, astarly oı arqyly oqyrmanǵa kózge kórinbeıtin, biraq júrekpen ǵana sezýge bolatyn áýendi estirte alǵan.
Sondaı-aq bul kitapty buǵan deıin jaryq kórgen «Palıtrasyz portretter» pýblısıstıkalyq jınaǵynyń zańdy jalǵasy ispettes jáne tulǵataný úderisine qosylǵan qomaqty úles dep aıtýǵa bolady.
Sharhan Qazyǵul jınaqtyń alǵashqy bólimindegi portrettik esselerinde keıipkerleriniń ishki álemine úńilip, kezeńniń rýhyn, ýaqyttyń minezin kórkem sýrettese, ekinshi bólimdegi maqalalarynda qoǵamdaǵy keıbir keleli máselelerdi ózindik tanymmen tasqa qashaǵan. Qysqarta aıtsaq, ultqa qyzmet etý degen ustanymdaǵy ultymyzdyń pýblısıstıka óneri bir ǵasyrdan astam ýaqyttan beri talaı kezeńdi bastan ótkerdi. «Segizinshi nota» sol ónerdiń órisin keńiter jınaq bolaryna úmit etemiz.
