Saltanatty is-sharada sóz alǵan qala basshysy memlekettik baǵdarlamalardyń júıeli júzege asyp jatqanyn atap ótti.
– Memleket basshysy Qasym-Jomart Toqaev halyqqa arnaǵan Joldaýynda halyqtyń áleýmettik máselesin sheshýdi basym baǵyt retinde aıqyndady. Megapolıste turǵyn úı qurylysy qarqyndy júrip jatyr. Birinshi kezekte baspanaǵa muqtaj jandar, ásirese, áleýmettik osal toptaǵy otbasylar qamtylady. Páterlerdiń sapasyna merdiger kompanııa tolyq kepildik beredi. Árıne, kezekte turǵan barlyq azamatty bir sátte baspanamen qamtý múmkin emes, bul – ýaqyt pen qarjyny talap etetin úderis. Sondyqtan kezektegi turǵyndardy sabyr saqtaýǵa shaqyramyn. Memleket óz mindettemelerin kezeń-kezeńimen, tolyq oryndaıdy, – dedi Ǵ.Syzdyqbekov.
Shymkent qalasy turǵyn úı basqarmasy basshysynyń mindetin atqarýshy Kópjan Tólebaevtyń málimetinshe, búginde megapolıste úı kezeginde 90 myńnan astam azamat tur. Jaldamaly páterlerdi úlestirý «Otbasy bank» AQ arqyly júrgiziledi. Bank tarapynan 544 áleýmettik osal toptaǵy azamatty baspanamen qamtý jumysy qolǵa alynǵan. Irikteýden ótken 235 otbasyna jaldaý shartyn jasasýǵa tizim joldanǵan. Sonyń ishindegi 24 otbasy qonystoıyn toılap otyr. Jalpy, osy ýaqytqa deıin tizimdegi 187 otbasy baspanaly boldy. Qalǵan 309 otbasynyń qujattary tekserilý ústinde, aldaǵy ýaqytta olarǵa da páter beriledi. Bıyl 1,5–2 myńǵa jýyq osal toptaǵy otbasyny baspanamen qamtý josparlanǵan.
Aıta keterligi, 2024 jylǵy 24 qarashadaǵy Turǵyn úı saıasatyn reformalaý týraly zańǵa engizilgen ózgeristerge sáıkes, barlyq jaldamaly páterler bolashaqta satyp alý quqyǵymen beriledi. Shymkentte páterdiń jaldaý quny aıyna orta eseppen 15–20 myń teńgeni quraıdy. Áleýmettik osal sanattaǵy azamattar úı alǵanda bastapqy jarna tólemeıdi, tek «Otbasy bankten» jeke kabınet ashyp, mártebesin rastaýy qajet.
Taǵy bir jańashyldyq – ákimdik endi turǵyn úıdi salýǵa tapsyrys bermeıdi, daıyn úılerdi satyp alady. Bul qurylys kompanııalarynyń jaýapkershiligin arttyryp, sapasyz qurylystyń aldyn alýǵa baǵyttalǵan tıimdi qadam bolyp otyr.
Jańa qonystanýshylardyń qatarynda kópbalaly, tolyq emes otbasylar, múgedektigi bar azamattar, erekshe bala tárbıelep otyrǵan jandar, sondaı-aq jetim balalar bar. Qala basshylyǵy turǵyn úı qoryn jańartý, halyqtyń áleýmettik jaǵdaıyn jaqsartý jumystary jalǵasa beretinin málimdedi.
ShYMKENT
