Sýretti túsirgen – Valerıı Býgaev
Ekibastuzdaǵy «Greenhouse-Qaztomat» jylyjaı kesheni basshylyǵy jýyqta sharýashylyqty keńeıtý josparyn tanystyrdy. Aıtýlarynsha, jobaǵa salynatyn jalpy ınvestısııa kólemi – 10,7 mlrd teńge. Jobany iske asyrý nátıjesinde keshen aýmaǵy 10 gektarǵa ulǵaıyp, jyldyq ónim kólemi 20 myń tonnadan aspaqshy. Jańa jylyjaıdy iske qosý jeltoqsan aıyna josparlanǵan. Qazirgi ýaqytta kásiporynda 450 adam eńbek etse, keńeıtý aıasynda qosymsha 120 jańa jumys orny ashylady. Kompanııa jergilikti kadrlarǵa basymdyq berip, básekege qabiletti jalaqy men kásibı ósý múmkindigin usynyp otyr.
Jalpy, ekibastuzdyq jylyjaıdaǵy kókónister jasandy jaryqtandyrý arqyly golland tehnologııasymen qorǵalǵan topyraqta ósedi. Al tuqym tolyqtaı Nıderlandtan, ósimdikterdi tozańdandyrýǵa arnalǵan aralar Anglııadan jetkizilip otyr. Tyńaıtqyshtar da shetten satyp alynady. Tek ósip shyqqan ónim ǵana otandyq sanalady. Bul da jylyjaı sharýashylyǵy úshin – mańyzdy másele.
Mundaǵy ónimder naryqta uzaq ýaqytqa saqtalatyn qasıetimen tanymal. Máselen, qyzanaq ónip shyqqan soń 12 aı buzylmaıdy. Ekibastuzdyń qyzanaqtary elimizdegi «Small» jáne «Magnum» sııaqty iri saýda jelilerinde turaqty satylady. Kókónister oblystaǵy áleýmettik dúkenderde de qoljetimdi baǵamen shyǵyp otyr: qııardyń kılosy –
980 teńge, qyzanaq – 925 teńge.
Pavlodar oblysy,
Ekibastuz qalasy
