Sheteldik ustazdarǵa erýlik berildi

Maǵjan Jumabaev atyndaǵy oblystyq ámbebap ǵylymı kitaphanasynda Qazaqstan halqy Assambleıasy jyly qurmetindegi kezekti tanymdyq shara ótkizildi. Basqosýǵa Kókshetaý qalasyndaǵy Nazarbaev zııatkerlik mektebinde ustazdyq etip júrgen Nıel Rýan (Ulybrıtanııa) men Nırmala Govender (OAR) erýlik joralǵysymen shaqyryldy. Bilim oshaǵynyń atshapty­rym oqý zalynyń tórine qazaqtyń kıiz úıi tigilip, bar jasaýymen jarqyrap tur. Kóksheniń bú­gin­gi serileri án shyrqap, kúı tó­giltti. Bosaǵadan attaǵan qo­naqtarǵa shashý shashylyp, keń-mol dóńgelek ústelge shaqyryldy. Dastarqan qazaq halqynyń ult­tyq taǵamdarymen ǵana emes, qa­ladaǵy ózge ult ókilderiniń asyl dámderimen toltyrylǵan. Qonaqtar bal baýyrsaq, kú­reń qymyz ben shubattan dám tat­qannan keıin, oblystyq musyl­man áıelderi lıgasynyń múshesi, seksen jastaǵy Kábıra Saqy­pova ájemiz halqymyzdyń arǵy-bergi tarıhynan áńgime bastady. «Erýlik» dástúriniń jaı-jap­sary, tereń máni túsindirildi. Zııat­ker­lik mekteptiń oqýshysy Balym Ken­jebaeva aǵylshynshaǵa aýdaryp otyr. Nıel baýyrymyzdyń qoıyn dáp­terindegi jazý qalyńdaı bastady. О́zge ulttyń ókilderi de qo­naq­ká­de­sin jasap, qaladaǵy tatar, nemis, slavıan, polıak etnomádenı ortalyq­tary­nyń jetek­shileri Mýdarıs Abdýl­lın, Svet­lana Korneeva, Galına Býly­­cheva jáne Lıýdmıla Sýhoveskaıa atal­­ǵan bir­lestikterdiń qoǵamdaǵy orny jaıly habardar etti. Son­daı-aq, Qazaq­stan halqynyń dosty­­ǵy, elimiz­degi yn­tymaq-birlik ta­qy­ry­bynda 15 jyl boıy eńbek­­­tenip, 6 albom daıynda­ǵan mádenıet­tanýshy Sıpat Tasova jádigerleriniń tanys­tyrylymy ótkizilýi jurtshylyqtyń qyzyǵýshylyǵyn týdyrdy. Afrıkalyq qyz Nırmala Govender qoshemetshi qaýymmen qosylyp bı bılep, óz tilinde án shyrqady. Al ser Nıel Rýan Anglııada dıasporalyq qaýym­dastyq bolǵanymen, barlyq ult­tyń basyn biriktiretin uıymnyń joqtyǵyn tilge tıek etti. – Bul Qazaqstan Prezıden­ti­niń kóre­gen saıasatshy, ulttardy uıystyrýshy tulǵa ekendigin kórsetedi, – dedi ol. – Assambleıanyń qazirgi daǵdarysty kezeń­de kezekten tys prezıdenttik saılaý ótkizý jóninde bastama kóterýiniń ózi onyń zor bedel men yqpalǵa ıe ekendigin aıqyn­daı túsedi. Men Kókshetaýdaǵy Nazar­baev zııatkerlik mektebine shaqyrý alǵa­nymda qýana kelistim. Mundaı bilim oshaǵy kóp elde kezdespeıdi. Meniń qazirgi oqýshylarym óte alǵyr, aǵylshyn tilinde erkin sóılesedi. Qazaqstandyq EKSPO-ǵa daıyndyǵymyz da jaman emes. Onyń ústine, kezinde EKSPO-da shyrqalǵan «Balqa­dısha» ánindegi Qa­dısha Kókshe­taý­dyń qyzy ekendigin bil­gen­­­degi tań­ǵalysymdy sózben jetkizý qıyn. Kezdesý sońy etnomádenı bir­les­tikterdegi kórkemónerpazdar uıym­darynyń konsertine ulasty. Baqbergen AMALBEK, «Egemen Qazaqstan». Aqmola oblysy. Sýretti túsirgen Aıbek DANIIаROV.