Hosep Gvardıola ataqty Zıdandy tárbıeleıtin boldy

ASTANA. 25 naýryz. Fransııanyń ataqty fýtbolshysy Zınedın Zıdan búginde jattyqtyrýshylyq qyzmette ter tógip júr. Aldaǵy kúnderi ol biliktiligin arttyrý maqsatynda Mıýnhenniń «Bavarııasyn» jattyqtyratyn Hosep Gvardıolanyń qol astynda tájirıbeden ótpek. Bul týraly eurosport.ru habarlady. Zıdan ózimen birge Mıýnhenge Vıllı Sanol men Klod Makeleleni alyp keldi. Endi úsheýi Gvardıolanyń jumys tásilimen tanyspaq. Birneshe kún ıspan mamanynyń qasynda júrip olar negizinen jattyǵý kezindegi taktıkalyq tásilderdi meńgermek. Buǵan deıin dańqty fýtbolshy belgili jattyqtyrýshy Marselo Belsanyń da qol astynda tájirıbeden ótken edi. Zıdan men Gvardıolla oıynshy kezinde san márte bir-birine qarsy alańǵa shyqty. Ol kezde Zızýdyń ataǵy aspandap turǵan edi. Al jattyqtyrýshylyq qyzmette ol Hosep myrzanyń tájirıbesine muqtaj. Búginde Zınedın Zıdan «Realdyń» (Madrıd) ekinshi komandasy «Kastılıanyń» bas jattyqtyrýshysy. Atalǵan komanda Ispanııa chempıonatynyń ekinshi dıvızıonynda (segýnda) oınaıdy. Sondaı-aq, Zıdannyń 2013-2014 jyldary Karlo Anchelottıdiń kómekshisi bolǵany belgili. Jankúıerler arasynda «jaqyn ýaqytta «Realdyń» tizginin Zıdan ustaıdy» degen pikirler jıi aıtylyp júr. Endeshe dańqty fýtbolshynyń bilikti mamandardan sabaq alýy sol maqsatta jasalǵan qadamdardyń biri desek te bolady. Elaman Qońyr. Derek: eurosport.ru. Sýret: planoinformativo.com.