Qysqy Olımpıadanyń jón-josyǵy qashanda bólek. Bul – jaı ǵana júlde úshin talas emes, qatysýshylardyń eren qabilet-qarymy, qajyr-qaıraty synalatyn ymyrasyz básekeler. Shańǵy, konkı jolyndaǵy jyldamdyq, short-trek, frıstaıl alańdaryndaǵy eptilik, mánerlep syrǵanaýdaǵy náziktik pen hokkeı aıdynyndaǵy tartys – bári-bári sportty serik etken jandardyń múmkindigin jan-jaqty pash etetin kórinister.
«Mılan-Kortına 2026» oıyndarynyń bir ereksheligi – onyń qos qalada qatar ótip, zamanaýı ýrbanıstıka men tabıǵat sulýlyǵyn úndestire bilýinde. Sol turǵyda búgin tutanatyn Olımpıada alaýy sporttyq básekelestikti ǵana emes, búkil álemdi beıbitshilikke, birlikke shaqyratyn úmit shyraǵy ispetti.
Tórtjyldyqtyń basty dodasynda elimizdiń namysyn 36 sportshy qorǵaıdy. Olar – Nadejda Stepashkına, Ksenııa Shalygına, Anna Melnık, Darıa Rıajko, Ámirǵalı Muratbekov, Vıtalıı Pýhkalo, Naıl Bashmakov (shańǵy), Evgenıı Koshkın, Krıstına Sılaeva, Elızaveta Golýbeva, Nadejda Morozova, Arına Ilıashenko (konkı), Dinmuhammed Raıymqulov, Sherzod Hashırbaev, Roman Ivanov, Asylhan Asan, Aıana Joldas (frıstaıl-akrobatıka), Iýlııa Galysheva, Anastasııa Gorodko, Pavel Kolmakov, Aıaýlym Ámirenova (frıstaıl-mogýl), Vladıslav Kıreev, Áset Dúsenov, Mılana Geneva, Aısha Raqysheva (bıatlon), Abzal Ájǵalıev, Denıs Nıkısha, Olga Tıhonova, Iаna Han (short-trek), Aleksandra Skorohodova, Rostıslav Hohlov (taý shańǵysy), Ilıa Mızernyh, Danıl Vasılev (shańǵymen tramplınnen sekirý), Mıhaıl Shaıdorov, Sofıa Samodelkına (mánerlep syrǵanaý), Shyǵys Raqparov (shańǵy qossaıysy).
Sýret JI arqyly jasaldy
Osy sportshylar arasynan frıstaıl-mogýlshy Iýlııa Galysheva, short-trekshi Denıs Nıkısha, mánerlep syrǵanaýshy Mıhaıl Shaıdorovty bóle-jara atasaq bolady. Olardyń barlyǵy da talaı dúbirli dodalarda darynymen oqshaýlanǵan dúldúlder. 33 jastaǵy Iýlııa Galysheva Phıonchhan Olımpıadasynda qola júldeni ıelengende, elimizdiń barsha jankúıerleri qýanǵany esimizde. Sporttyq mansabynda ol álem chempıonatynda tórt ret jeńis tuǵyryna kóterildi. Júldelerdiń bireýi altyn, ekeýi kúmis, bireýi qola. Sondaı-aq qorjynynda Azıada men Ýnıversıadanyń úsh altyny bar. 30 jastaǵy Denıs Nıkısha keıingi eki álem chempıonatynda qola medaldy moınynda jarqyratty. Dúnıejúzilik ýnıversıadada tórt ret úshinshi orynǵa turaqtady. 21 jastaǵy Mıhaıl Shaıdorov 2025 jylǵy dúnıejúzilik dodada kúmispen kúpteldi. Bul sańlaqtarmen birge túrli baıraqty básekelerde aýyz toltyryp aıtarlyqtaı tabysqa qol jetkizip júrgen konkıshi Evgenıı Koshkın, short-trekshi Abzal Ájiǵalıev, taý shańǵyshysy Aleksandra Skorohodovaǵa da zor úmit artylyp otyr.
«Qaı óńir eń kóp sportshylaryn Apennın túbegine attandyrdy?» degen suraqqa keletin bolsaq, bul rette Astana, Shymkent qalalary, Shyǵys Qazaqstan oblysy ózgelerden kósh ilgeri. Olardyń árqaısysy tórt sańlaǵyn dúbirli dodaǵa qospaqshy. Pavlodar, Almaty oblystarynan – úsh, Qostanaıdan – eki, Soltústik Qazaqstan, Qaraǵandy, Abaı oblystarynyń bir-bir ókili baq synaıdy.
