Jupar Ǵabdýllına, Qazaqstannyń eńbek sińirgen qaıratkeri, opera ánshisi: Opera – ýaqyt pen tózimdi talap etetin óner

– Jupar Baqtybekqyzy, siz opera sahnasyn baǵyndyrmas buryn dombyranyń qulaǵynda oınaǵan keremet kúıshi, sol salada arnaıy kásibı bilim de alǵan ekensiz. Tabıǵaty bir-birinen alshaqtaý dástúrli óner men akademııalyq klassıkalyq mýzykany shashaýyn shyǵarmaı ıgerip ári birinen ekinshisine qalaı aýystyńyz?

– Shynynda, 20 jasyma deıin bir ret te án salǵan emespin. Án aıtý túgili, daýysym­nyń qandaı ekenin de asa ańǵarmaı óstim. Jaı ǵana jaqsy oqysam, dáriger nemese muǵalim sekildi bir mamandyqtyń ıesi bolarmyn dep oılaıtynmyn. Al bos ýaqytymda dombyrany qolyma alyp, kúı úırenetinmin. Bul jol aýyldaǵy qarapaıym úıirmelerden bas­talyp, birtindep tereń izdenis pen kásibı shyńdalýǵa ulasty. Dombyra tek aspap emes, ózimdi erkin sezinetin, jan dúnıemdi ashatyn keńistik edi. Birde synyp jetekshimiz Kenjehan apaı «Semeı tańy» gazetin alyp keldi. Onda Muqan Tólebaev atyndaǵy mýzyka kolledjine qabyldaý júrip jatqany týraly habarlama bar eken. Sol kezde ǵana «9-synyptan keıin de oqýǵa túsýge bolady eken ǵoı», degen oı keldi. Bul armannan góri, baǵymdy synap kórý edi. Ákem qoldap, ózi alyp bardy. Mine, sodan bastap ónerge degen kózqarasym kásibı arnaǵa buryldy. Kolledjde dombyra mamandyǵy boıynsha tórt jyl bilim aldym. Ustazym –
Qazaqstannyń eńbek sińirgen qaıratkeri Serik Malaev. Ol kisiden oryndaýshylyq sheberlikti ǵana emes, ónerge degen tereń kózqarasty, sahna mádenıetin, ishki tártip pen úlken jaýapkershilikti úırendim. Bul kezeń mýzykant retinde qalyptasýymda myzǵymas negiz qalap berdi. Al Qurmanǵazy atyndaǵy Qazaq ulttyq konservatorııasyna kelgen kezim – ómirimdegi eń úlken betburystyń biri boldy. Dál sol jerde jolym kútpegen baǵytqa – opera ónerine qaraı buryldy. Buǵan deıin ózimdi tek kúıshi retinde tanyp kelgen maǵan endi án áleminiń esigi ashyldy. Al dombyra arqyly qalyptasqan estý qabileti, mýzy­kalyq túısik pen sahnaǵa degen ishki daıyndyǵym osy jańa keńistikke beıimdelýge múmkindik berdi. Sóıtip, dástúrli ónerden bastalǵan jol akademııalyq kla­s­sıkamen, opera sahnasymen toǵysyp, shyǵarmashylyq taǵ­­­­dy­­rymdy múlde jańa beleske kóter­di.

– Álbette, ońaı bolmaǵan shyǵar...

– Iá, bul joldyń, tańdaýdyń artynda óte úlken eńbek turdy. Qurmanǵazy atyndaǵy Qazaq ulttyq konservatorııasynda oqý­­dy daıyndyq kýrsynan bastadym. Sol kezeńde ishteı «qatarymnan qalyp bara jatyrmyn» degen alań da boldy. О́ıtkeni kýrstastarymnyń basym bóligi kolledjden tikeleı kelgen, vokaldyq ári teorııalyq daıyndyǵy áldeqaıda myqty edi. Sondyqtan ózime qatań talap qoıdym. Eger olar emtıhanda tórt shyǵarma oryndasa, men eki ese, tipti tórt ese kóp shyǵarma jattaýym kerek dep sheshtim. «Qýyp jetý ǵana emes, basyp ozý kerek» degen ishki maqsat qoıdym. Sol úshin ýaqytpen sanaspaı eńbek ettim, kúni-túni daıyndaldym. Kúıshilik – qanmen kelgen, boıymyzǵa sińgen óner. Dombyra – tabıǵı bolmysymyzdyń bir bólshegi. Al álemdik klassıkalyq mýzykany ıgerý álippeni qaıta ashqanmen birdeı. Qaı kompozıtor qaı elden, qaı ǵasyr­da ómir súrgen, stıli qandaı, mýzykalyq tili neden turady – barlyǵyn basynan bastap úı­renýge týra keldi. Tańǵy tórt-beste turyp, shyǵarmalardyń mátinin jattaıtyn sátter az bolǵan joq. Ol kezde konservatorııada daıyndyq klastary tapshy edi, bárine aldyn ala kezekke jazylatynbyz. Tańǵy jetide baryp daıyndalyp, odan keıin toptyq sabaqtarǵa qatysamyz. Keıde emtıhan jaqyndaǵanda túngi on ekige deıin aýdıtorııada otyryp oqıtynbyz. Sol kezderde sharshaý da, kúmán da boldy, biraq bir sátke de «oqýdy tastaımyn» degen oı kelgen joq. О́ıtkeni ata-anam oqýǵa jiberdi, senim artty ǵoı. Mekteptiń úzdik oqýshysy bolý da «jaqsy oqý kerek, izdený kerek, namysqa tyrysý kerek» degen qasıetti boıyma sińirgen sııaqty. Qazir oılasam, dál sol kezeń meni shyńdapty. О́zime degen senimdi de, sahnaǵa shyǵatyn ishki tózimdilikti de osy jyldar qalyptastyrdy. Operaǵa kelý  bir sáttik shabyttyń emes, ózińdi qaıtadan tárbıeleýdiń, qaıtadan úırenýdiń nátıjesi ekenine sol kezde kózim jetti.

– «Talant topyraqqa tartyp týady», al adam minezi, dúnıeta­­­ny­my kóbine otbasyndaǵy tár­bıe­ge baılanysty deımiz. Siz ósken orta qandaı edi?

– Men Semeı óńiriniń, qazirgi Abaı oblysynyń týmasymyn. Burynǵy Semeı oblysy, Aıagóz aýdanyna qarasty Tarbaǵataı aýy­lynda dúnıege keldim. Shaǵyn ǵana aýyl bolǵanymen, tabıǵaty erekshe. Sol topyraqta óstik, tumsa tabıǵattan qýat aldyq. Bizdiń aýyl­dan, jalpy osy óńirden talaı aqyn-jazýshy, óner adamdary shyqqan. Munyń bári adamǵa áser etpeı qoımaıdy. Týǵan jerdiń qudireti degen – osy. Ákem – qurylysshy, anam – dáriger. Qazir ekeýi de zeınette, jastary seksennen asty, Allaǵa shúkir. Kásipteri ónermen tikeleı baılanysty bolmaǵanymen, rýhy ónerge óte jaqyn jandar. Anamnyń ádemi, syńǵyrlaǵan daýysy bar. Ákem de ónerden qur alaqan emes. Áli kúnge deıin úıde án aıtady. Bala kúnimnen qulaǵym anamnyń syńǵyrlaǵan daýsyna, ákemniń qońyr únine qanyp ósti. Odan bólek, aýyldaǵy mektepte kezinde túrli úıirmeler bolatyn. Sonyń bárine qatystyq. Sol ortada júrip talaı talantty kórdik. Bizden tórt-bes jas úlken, ózimizben qatar ósken balalardyń kóbi búginde elimizge belgili óner adamdary: biri – aqyn, biri – kompozıtor, biri – ánshi. Aýylda mádenıet úıi bar edi, ol kezde «klýb» deıtinbiz. Sol jerde kórkemónerpazdar úıirmesi jumys istedi. Biz otbasymyzben, tipti ansambl bolyp qatysatynbyz. Bireýimiz tuıaqtaspen oınaımyz, bireýimiz syldyrmaq ustaımyz. Úıde alty balamyz: bir aǵamyz bar, bes qyzbyz. Barlyǵymyz ónerden kende bolǵan joqpyz, biraq kásibı joldy tańdaǵan – men ǵana. Qalǵandary óz salasyn tapty.

– Bilesiz be, sizben áńgime­le­sip otyryp, únińizdiń áýez­di­ligi ǵana emes, tilińizdiń de tazalyǵy aıryqsha tánti etip otyr. Ádette klassıkalyq óner ókil­deriniń kópshiligi orys tilinde erkin sóılep, qazaqsha oı aıtýǵa kelgende tosylyp qalady....

– Men úshin bul – óte qaǵıdatty másele. Týǵan tilimdi, tól bolmysymdy sahnada da, ómirde de qorǵaý – mindetim. О́z elimde, óz jerimde júrip suhbatty ana tilimde bermeý uıat dep esepteımin. Oıyńdy, ishki sezimińdi, júrekten shyqqan sózdi óz tilińde ǵana to­lyq jetkize alasyń. Árıne, kásibı ortada basqa tilderdi bilý qajet. Dırıjerlermen, sheteldik áriptestermen jumys isteımiz. Men de birneshe shet tilin erkin ıgergenmin. Italıan jáne orys tilinde jumys barysynda sóılese beremiz. Biraq qazaq kórermenine arnap til qatqanda qazaqsha sóı­leý – azamattyq ustanymym. Keıde oryssha suhbat surasa da: «Men qazaqsha jaýap bereıin, ózińiz aýda­ryp alyńyz», – dep aıtamyn.

– Al konservatorııa dıplomyn alyp, sahnaǵa alǵash shyq­­qan sátińiz esińizde me? Alǵashqy par­tııańyz qandaı boldy? Sol kezeń­ge bir sát lırıkalyq shegi­nis jasaıyqshy…

– Ol kez eshqashan umytyl­maı­dy. Konservatorııany Raýshan Smaıylova men Qazaq­stan­nyń halyq ártisi, Memle­ket­tik syılyqtyń laýreaty Shahımardan Ábilovtiń sheberhanasynan támamdap, 2007 jyly Abaı atyndaǵy Qazaq ulttyq opera jáne balet teatryna solıst bolyp qabyldandym. Teatrdyń kezekti spektaklderiniń biri – Muqan Tólebaevtyń «Birjan – Sara» operasy qoıyldy. Jańa maýsym ádette «Abaı» operasymen ashylady da, kelesi spektakl osy «Birjan – Sara» edi. Maǵan Altynaı róli buıyrdy. Saranyń partııasyn Qazaqstannyń halyq ártisi Nurjamal Úsenbaeva, Birjannyń rólin Qazaqstannyń eńbek sińirgen qaıratkeri Ulan Kenjebekov somdady. Ol kisiler ańyz tulǵalar, álemge tanylǵan ánshiler ǵoı. Solarmen bir sahnada óner kórsetý úlken mektep boldy. Operada «kishkentaı ról bolmaıdy» deıdi ǵoı, ol ras. Altynaı –
daýsymnyń tabıǵatyna dál kelgen partııalardyń biri edi. Sol spektaklge shyqqanymdy maqtanyshpen aıtamyn. Keıin de túrli róldi somdadym. So­lardyń ishinde daýsym­nyń múm­kindigin tolyq ashqan partııa­lar­dyń biri – Djýzeppe Verdıdiń «Trýbadýr» operasyndaǵy Leonoranyń róli. Ákem men anam arnaıy aýyldan kelip, spektakldi kórdi. Operanyń uzaqtyǵyn bilesiz, eki antraktimen keıde úsh, tipti úsh jarym saǵatqa deıin sozylady. Leonora – óte kúrdeli partııa. Sońynda lıbretto boıynsha keıipker óledi. Spektakl bitken soń ákemdi kórdim, jylap tur. «Bundaı óletin rólderdi endi oınama, shyn ólgendeı áser etti» dedi. Shynymdy aıtsam, sol kezde olardyń qatty qýanyp turǵanyn kórmedim. Ákemniń jylaǵany ǵana esimde qaldy. Qazir sol jaǵdaıdy eske alyp, kúlip otyramyz.

– Ustaz ben shákirt arasyn­daǵy sabaqtastyq týraly aıt­saq, ustazyńyz Shahımardan Ábilev oıǵa oralady. Ol kisiniń shyǵar­mashylyq temirqazyǵy  Abaı ekeni belgili. Siz de Abaı topyraǵynyń týmasysyz. Osy arada bir rýhanı altyn ózek bar ma?

– Árıne, bar. Shahımardan Qaıdaruly – keremet adam. Abaıdy tereń zerttegen, áli kúnge deıin Abaı arqyly qazaqty álemge tanytyp júrgen tulǵa. Men úshin de Abaı – rýhanı tirek. Ustaz ben shákirt arasyndaǵy túsinistiktiń bir altyn ózegi osy – Abaı álemi. Bul – tek óner emes, dúnıetanym. Senesiz be, úlken sahnaǵa alǵash shyǵýyma sebepker bolǵan oqıǵa da tikeleı hakim esimimen baılanysty eken. 1995 jyly Abaıdyń 150 jyldyǵy IýNESKO kóleminde atalyp ótti. Mereıtoıdyń aýqymy erekshe boldy. Shetelden kóptegen mýzykanttar keldi, birneshe memlekettiń prezıdenti qatysty. Ertistiń boıynda alyp sahna quryldy. Otshashýlar, sahnalyq qoıylymdar, tipti Ertiske aqqý­­lar­dy alyp kelgenin kórdik. Sol kezde «Báıge» ansamblimen álemniń birneshe prezıdentiniń aldynda óner kórsettik. Nebári on bes-on alty jastaǵy balalarmyz ǵoı. Kishkentaı ǵana ansambl, biraq alyp sahna, úlken jaýapkershilik. Sol sátte bir nárseni uqtym: úlken sahnaǵa shyǵý – tek ataqtylardyń ǵana úlesi emes, oǵan eńbek etken ár adam jete alady eken. Bul maǵan ómirlik serpilis berdi. Odan keıingi taǵy bir eleýli oqıǵa – Muhtar Áýezovtiń «Abaı» operasynda Ajardyń rólin somdaýym. Alǵashqy teatrym da, alǵashqy kórermenim de Abaı atyndaǵy teatr eken. О́mirde de Abaıdy zerttegen ustazdar da, dostar da kóp boldy. О́zim de Abaı ánderin jıi oryndaımyn. Menińshe, Abaıdy oqyǵan, Abaıdy súıgen adam óner jolynda da, ómir jolynda da adaspaıdy.

– Opera ánshileri erekshe kútimdi, aıryqsha rejimdi qajet etedi dep jatady. Siz daý­syńyzdy qalaı saqtaısyz?

– Daýystyń eń úlken jaýy – tabıǵatyńa qarsy keletin rólder. Operada partııalar eki-úsh saǵatqa sozylady. Keıbir ánshi jarty jyl daıyndalady, endi biri eki-úsh aıda sahnaǵa shyǵady, al keıbir kúrdeli partııalarǵa bir jylyn arnaıdy. Bul árkimniń múmkindigine baılanysty. Biraq daýysyńa saı kelmeıtin róldi aıtý – óz-ózińe jasalǵan qastandyqpen teń. Tabıǵatqa qarsy kele almaısyń. Rejimdi saqtamaǵan ánshiler qy­ryqqa jetpeı-aq, otyzdan asqanda daýsynyń syńǵyryn joǵaltyp alady. Sondyqtan ár ánshi óz daýsyn tolyq zertteýi kerek. Árıne, fonıatr dáriger de, keremet pedagogter de bar. Biraq eń bastysy – ózińniń tabıǵatyńdy óziń seziný. Bizdiń mamandyq – kózge kórinbeıtin, qolǵa ustaı almaıtyn óner. Fortepıanoda saýsaqty kórsetip qoıýǵa bolady, al daýysty olaı ólsheı almaısyń. On adam tyńdasa, on túrli pikir aıtady. Úniń bireýge lırıkalyq, bireýge dramalyq bolyp estilýi múmkin. Sol sebepti ustazdyń sózine senip qana qoımaı, belgili bir ýaqyt berip, baıqap kórý kerek. Bul – ustaz biliktiligine kúmándaný emes, ánshiniń óz tabı­ǵa­tyna jaýapkershilikpen qaraýy.

– Al tamaqtaný tártibi qa­laı? Opera ánshileri qandaı da bir qatań erejelerdi ustana ma?

– Opera ánshisi degende kópshilik túsiniginde qatyp qalǵan bir qalyp bar. Ol – dıeta, shekteý, qatań rejim. Alaıda kim ne dese de, men qazy-qartadan bas tarta almaımyn. Sebebi et jep ósken aýyldyń balasymyz ǵoı. Shetelge shyqqanda da qazy alyp baramyn, odan basqa maǵan eshteńe kerek emes (kúlip). Árıne, qazir densaýlyǵyma baılanysty keı taǵamdardy jeı almaımyn. Biraq etten bas tartý múmkin emes. Jalpy, óz tabıǵatyma qarsy kelmeımin. Bireý aryqtasa – daý­sy ketedi, bireý tolsa – kerisinshe degendeı. Sol sekildi men de óz daýsymdy kóp zerttedim. О́zime ne jaǵyp, jarasatynyn jaqsy bilemin. «Altyn orta» degen bar ǵoı, bastysy sony tabý kerek.

– Bir suhbatyńyzda: «Opera – búgin oqyp, erteń sahnaǵa shyǵa salatyn mamandyq emes», degen edińiz. Biraq ómir jolyńyzǵa qarasaq, jıyrma jasqa deıin kúımen aınalystyńyz, al operaǵa keıin keldińiz. Keı sátte «Úlken ónerge keshigip kel­dim» degen oı mazalamaı ma?

– Joq, ony eshqashan ókinish dep qabyldaǵan emespin. Negizi opera óneriniń óz zańdylyǵy bar. Adam aǵzasy ósip, daýsy da bir kezeńde tolysady. Qyz balalardyń operany kásibı túrde oqýy shamamen 17–18 jastan keıin bastalady, al er adamdardyń úni 18–19 jasynda kemeline keledi. О́ıtkeni daýystyń ózi de bas, sop­rano, messo-soprano, tenor, barıton dep bólinedi. Onyń ishinde de lırıkalyq, dramalyq túrleri bar. Ár kompozıtor óz shyǵarmasyn naqty bir daýysqa arnap jazady. Sondyqtan opera – asyǵystyqqa kónbeıtin, ýaqyt pen tózimdi talap etetin óner.

– Siz ulttyq operada da, álemdik klassıkada da teń óner kórsetip júrsiz. Sonyń ishinde qaısysy janyńyzǵa jaqyn? Qaı partııa, qaı kompozıtordy erekshe qurmetteısiz?

– Eń qıyn suraqtardyń biri – osy. О́ıtkeni oryndaǵan ár partııańa búkil mahabbatyńdy arnaısyń. Ýaqytyńdy, kúsh-jigerińdi, júıkeńdi beresiń. Sonda qalaı ǵana «mynaý jaqsyraq, al mynaý ekinshi orynda» dep aıta alasyń? Men oryndaǵan ár rólimdi jaqsy kóremin. Ár kompozıtor, ár shyǵarma erekshe qymbat. Júregime, janyma jaqyn emes dúnıeni sahnaǵa eshqashan shyǵarmaımyn. О́ıtkeni ol ózimdi aldaýmen teń. Al ózińdi aldasań, kórermendi de aldaǵan bolasyń.

– Áli de somdasam dep armandap júrgen rólderińiz bar ma?

– Árıne. Onsyz bola ma? Opera – daýys pisken saıyn múmkindik keńeıetin janr. Ár ról – tek mýzykalyq oryndaý emes, jan dúnıeńniń kórinisi, árbir emosııanyń sahnadaǵy tiri denege aınalýy. Eń úlken armanymnyń biri – Djakomo Pýchchınıdiń «Madam Batterflıaı» operasyn oryndaý. Bul monoopera, ıaǵnı bir ánshi búkil týyndyny sahnada jalǵyz jetkizedi, oǵan daıyndyq óte kóp ýaqyt alady. Keıipkerdiń obrazyn ashý, kóńil kúıin jetkizý – úlken synaq. Ár demde shynaıylyq, ár notada sezim bolýy kerek. Keıip­ker­diń ishki álemin asha otyryp, kórermenge jetkizý – tek daýystyń emes, rýhtyń da áni. On jyl buryn osy operada oınaý múmkindigi týyp-aq edi. Biraq óki­nish­ke qaraı, buıyrmady. Dál premeraǵa daıyndyq bastalǵan kezde Krasnoıar teatrynan qatty aýyryp kelip, spektaklge qatysa almadym. Keıin pandemııa boldy, taǵy da basqa kedergiler týyndady. Sol sebepti bul armanym keıinge shegerildi. Biraq Batterflıaı áli kúnge deıin júrek túk­­pirindegi úlken armanym bolyp qaldy.

– Sheteldik tájirıbe týraly aıtsaq, Italııada, basqa da elderde jıi taǵylymdamadan ótesiz. Bul opera ánshisine ne beredi?

– Eń aldymen bilim beredi. Italııa operanyń besigi ǵoı. «La Skala» teatryna baryp, jaı ǵana qoıylymdaryn kórýdiń ózi – úlken mektep. Al álemdik deńgeıdegi sheberlermen jumys isteýdiń baǵasy tipti teńdessiz. Taǵylymdama – ánshige tek tehnıka emes, oılaý mádenıetin beredi. Keıde óz betińshe jyldap úırenetin dúnıeni, ol jerde qysqa ýaqyttyń ishinde meńgerip shyǵasyń. Sondyqtan opera ánshisine taǵylymdamadan jıi ótý óte qajet. Máselen, Muqan Tólebaevtyń 100 jyldyǵyna arnalǵan mádenı sharada «Birjan – Sara» operasyn Túrkııa elin­de alǵash ret túrik tilinde oryn­­­­dadym. Úlken tájirıbe boldy. Árbir ártiske osyndaı tyń tájirı­be men ádemi áser kerek.

– Ulttyq opera óneriniń búgingi aıaq alysyn qalaı baǵa­laı­syz?

– Ǵabıt Músirepov pen Evgenıı Brýsılovskııdiń «Qyz Jibek», Muqan Tólebaevtyń «Birjan –Sara», Sydyq Muhamedjanovtyń «Aısulý», Ahmet Jubanov pen Latıf Hamıdıdiń «Abaı» operalarynyń qaı-qaısysy da – qazaq óneriniń qundy qazynasy. Degenmen, qazirgi qazaq operasynda jańa týyndylarǵa degen qajettilik ańǵarylady. Atalǵan kompozıtorlarymyzdyń baı dástúri, syndarly joly bar, biraq búgingi kózqaras, tanymǵa saı jańa stıl, sony serpilis, tyń baǵyttaǵy shyǵarmalar kerek. Áıtpese qazaq operasy uzaq ýaqyt únsiz qalǵandaı áser qaldyrady. Bul – jeke tilek emes, óner úshin ózekti, mańyzdy másele. Ulttyq opera ónerindegi osy bir túıtkildi talantty kompozıtorlarymyz tezirek qolǵa alyp, jańa týyndylaryn sahnaǵa shyǵarsa eken degen tilegim bar. Árıne, ońaı sharýa emes, biraq múmkin emes dep te aıta almaımyn. Máselen, jaqynda teatry­myzda premerasy ótkeli jatqan «Appaq» operasynan kóp úmit kútemin. Ulttyq operanyń damýyna úles qosatyn, jańa lep beretin jarqyn jobalardyń biri bolady dep senemin. Jalpy, ónerdiń sapasy júıeli eńbek pen ýaqytty qajet etedi.

– «Astana Opera» teatry sahnasyndaǵy kesek rólderińiz­ben qatar ustazdyq joldaǵy eń­begińiz de aýyz toltyryp aıtý­ǵa turarlyq. Munyń bárine kúsh-jigerdi qaıdan alasyz?

– Ustazdyq jol – ómirimdegi erekshe taraý. Talantty, daryndy jastardy jaqsy kóremin. О́ıtkeni ózim de aýyldan kelip, úlken qalanyń, úlken ónerdiń jolyn bilmeı aınalańnan jylý izdegende, ustazdarymyz bizge mahabbatpen qarady, ónerimizdi tanyp, jol kórsetti. Endi sol jylýlyqty shákirtterime berý – maǵan da paryz. Ánshi retinde óz jolymdy izdegende de ustaz bolý – eń durys qadam boldy. О́ıtkeni birge úırený, birge izdený – erekshe tájirıbe. Sonyń bir jarqyn mysaly – jaqynda elimizde birinshi bolyp opera agenttigin ashtyq. Onyń basty maqsaty – talantty ánshilerge qoldaý kórsetý. Álemde qazir opera ánshileri agentsiz jumys isteı almaıdy, al bizdiń jas ánshilerge dál sol múmkindik kerek. «Dala Voices» atty alǵashqy konsertimizdi óz teatrymyzda ótkizdik, endigi jospar – shetelde de, elimizde de jas ónerpazdardy tanystyrý. Árıne, memleket tarapynan qarjylyq qoldaý men mesenattardyń kómegi qajet, óıtkeni agenttiksiz jas ánshiler halyqaralyq deńgeıde ózderin kórsete almaıdy. Men úshin aıtýly bastama tek kásibı ǵana emes, qazaq operasyn jańǵyrtýǵa, jas talanttardy damytýǵa arnalǵan mańyzdy qadam.

– Opera ómirińizdiń mánine aınalǵanyn bilemiz. Al dombyrany qolyńyzǵa qanshalyqty jıi alasyz?

– Qazir dombyramdy buryn­ǵy­daı jıi tartpaımyn. Oǵan ýaqyt ta kóp mursat bere bermeıdi. Biraq aýylǵa barǵanda, ákemniń dom­byrasyn alyp, bir-eki kúı sher­tip qoıamyn. Saýsaqtarym áli umytqan joq. Kúıdiń mátini, kúıdiń minezi boıymda saqtalǵan.

– Áńgimeńizge rahmet.

Áńgimelesken –

Nazerke JUMABAI,

«Egemen Qazaqstan»