Zańsyz berilgen jerdiń zardabyn taǵy da halyq tartýda

ShYMKENT. 26 naýryz. Ońtústik Qazaqstan oblysy Saıram aýdany Qarabulaq eldi mekenindegi jıyrma shaqty otbasy dalada qalýy múmkin. Sebebi, osydan úsh jyl buryn olarǵa memlekettik aktimen berilgen jer telimderi zańsyz dep tanylyp otyr. Bul týraly otyrar.kz habarlady. Múlikteriniń zańdylyǵyn rastaıtyn qujattarǵa súıengen turǵyndar ol jerlerge baspanalaryn salyp, qonystananyp alǵan. Soǵan qaramastan sot sheshimin negizge alǵan quzyrly organ ókilderi halyqtan jerdi bosatýyn talap etýde. Úı-jaılaryn saılap alǵan halyq búginde qaıda baryp muń shaǵaryn bilmeı dal bolýda. «Eń bolmasa qurylysty bastamaı jatyp eskertpeı me?», – deıdi olardyń biri. Mundaǵy elektr baǵanalaryn turǵyndar óz qarajatymen turǵyzǵan. Olardyń ótinishimen gaz júıeleri qaralyp, sý qubyrlary da júrgizilip qoıǵan. Halyq turǵyn úı úshin belgilengen salyqty da tólep keldik deıdi. Turǵyndardyń arasynda nesıe alyp, úı salǵandary da bar. О́tken jyldyń maýsym aıynda prokýratýra tekserýleriniń qorytyndysy boıynsha 23 jer telimi zańsyz dep tanylǵan. Kezinde óndiristik kooperatıvke tıesili sýarmaly 3 gektarǵa jýyq jer menshik ıesiniń qaıtys bolýyna baılanysty memleketke qaıtarylǵan. Sóıtip 2011 jyly Qarabulaq aýyldyq ákimdiginiń laýazymdy tulǵalalary marqum bolǵan menshik ıesiniń muragerlerimen kelisip, jerdi kezektegi turǵyndarǵa zańsyz úlestirip bergen. Qazir zańdy belden basqan tulǵalar jaýapkershilikke tartylǵan. Úlestirilgen jer telimderiniń teń jartysyna búginde baspana salynǵan. Endi turǵyndarǵa materıaldyq shyǵyndardyń da tólenener-tólenbesi ekitalaı. Baqtııar Taıjan. Derek, sýret: otyrar.kz.