AÝLADAǴY JASYL ALAŃ JARASYM TAPTY

“Qara qurlyqta” fýtboldan álem chempıonaty dúrildep ótip jat­qanda, jambyldyq sheneýnikter de tarazdyq jas fýtbolshylardy tosyn syılyqpen tańqaldyryp tastady. Ol syılyqtyń “avtory” Jam­byl oblysynyń ákimi Qanat Bo­zymbaev desek te jarasatyn sııaqty. Atap aıtsaq, Áıteke bı kóshe­sin­degi №11 kópqabatty turǵyn úıdiń aýlasynan shaǵyn fýtbol alańy ashyldy. Ereksheligi – ol jasandy “shóppen” jabylǵan. Kó­galdan aıyrmasy joq bul jasandy jamylǵyny isker azamattar sonaý Gollandııadan arnaıy aldyrypty. Sózdiń toqeteri, balalar alańsyz ala dop tebetin alańnyń qurylysy halyqaralyq talaptarǵa saı. Aıtpaqshy, balalar men olar­dyń ata-analary úshin taptyrmas alań oblys boıynsha fýtboldy damytý baǵdarlamasy sheńberinde júzege asyrylypty. Ákimniń aı­týyna qaraǵanda, aldaǵy ýaqytta ob­lys kóleminde osyndaı 20 fýt­bol alańy salynbaqshy eken. Onyń teń jartysy Taraz qalasyndaǵy kópqabatty turǵyn úılerdiń aýla­synan oryn teppek. – Elbasy Nursultan Nazar­baev­t­yń bıylǵy Joldaýynda Qa­zaq­stan halqynyń keminde 30 paıy­zyn buqaralyq sportpen qamtý máselesi alǵa qoıylǵany belgili. Sondyqtan buqaralyq sporttyń damýyna biz erekshe kóńil bólemiz. Fýtbol alańdarymen birge, bıyl oblysymyzda 20 boks zalyn ashamyz. Sporttyń basqa túrlerin damytý boıynsha da josparlar bar, – dedi aýladaǵy jasyl alańǵa kelip, ala dopty alǵashqylardyń biri bolyp tepken oblys ákimi Q. Bozymbaev. Atalǵan fýtbol alańdary tek demeýshilerdiń kómegi esebinen salynýda. Mundaı bastamany endi aýdan ákimderi qolǵa almaqshy. –Men osy úıdiń “basshysy” degen jaýapkershilikti moınyma alǵan kezde 38 jasta edim, qazir 68 jasqa keldim. Iаǵnı, aýla balalary 30 jylǵa jýyq qara topyraqtyń ústinde dop qýyp keldi. Endi, mine, oblys ákimi Qanat Aldabergen­ulynyń bastamasymen aq shańdaq jer jasyl tústi jasandy jamyl­ǵymen túrlenip shyǵa keldi, – deıdi Sánııa Asanova apaı qýanyp. Búginde oblysta 4 000 bala fýtbol sportymen aınalysady. “Taraz” fýtbol klýbynyń kóptegen oıynshylary alǵashqy goldaryn osyndaı shaǵyn alańdarda soqqa­nyn eskersek, Áıteke bı kóshe­sindegi №11 úıdiń aýlasynan bo­lashaq  Lıonel Messı, Krısh­tıaný Ronaldý jáne Devıd Bekhem sııaqty juldyzdar shyǵyp jatsa, esh tańqalmańyzdar. Kósemáli SÁTTIBAIULY, Jambyl oblysy.