Osy oraıda elimizde de armııany barlaýshy ári soqqy berýshi drondarmen ári onyń tilin biletin mamandarmen jasaqtaý – ýaqyt talaby. Ol úshin túrli is-shara ótkizilip, tıimdi sheshimder qabyldanyp jatyr. Sondaı is-sharanyń biri – Ulttyq qorǵanys ýnıversıteti (UQÝ) Áskerı-zertteý ınstıtýtynyń bazasynda ótken Qurlyq áskerleri ushqyshsyz avıasııalyq júıeleri operatorlarynyń biliktiligin arttyrýǵa arnalǵan aptalyq kýrs.
Munda sarbazdarǵa arnalǵan sabaqtardy ushqyshsyz avıasııa salasynda on jyldan asa jumys tájirıbesi bar oqytýshylar men nusqaýshylar júrgizdi. Kýrs barysynda qazirgi jaǵdaıda suranysqa ıe tájirıbelik daıyndyqqa negizgi basymdyq berilgenin aıta ketý kerek.
Áskerı qyzmetshiler «Torǵaı-10» qurylǵysyn ushqyshsyz ushý apparatyna bólshektep jınaý daǵdylaryn meńgerdi. Sonymen qatar taktıkalyq-tehnıkalyq sıpattamalaryn zerdelep, qaýipsizdik sharalary men ártúrli jaǵdaıda qoldaný erekshelikterin de úırendi. Buǵan qosa Ulttyq qorǵanys ýnıversıtetiniń ǵylymı qyzmetkerleri ázirlegen «Ara» drondaryn qoldanýdyń tájirıbelik sabaqtary júrgizildi.
Jeke oqý modýli FPV-drondarǵa arnalǵan. Bul sabaqta tyńdaýshylar olardy qurastyrý, baǵdarlamalaý, dıagnostıkalaý men aqaýlaryn joıýdy meńgerip shyqty.
«Biz qoldanbaly daǵdylarǵa basymdyq beremiz. Maqsatymyz – alǵan bilimderin óz bólimshelerinde tarata alatyn mamandardy daıarlaý», dep atap ótti UQÝ Qarý-jaraq jáne áskerı tehnıka ǵylymı zertteý ınstıtýty zertteý qyzmetiniń bastyǵy, polkovnık Jarqyn Qabdolda.
Ushqyshsyz avıasııalyq júıelerdi qoldaný jeke quramnyń qaýipsizdigin arttyryp, jaýyngerlik tapsyrmalardy oryndaýdyń tıimdiligin joǵarylatady, dáldikti, jedel barlaý men qarsylasqa qashyqtan áser etýdi qamtamasyz etedi.
«Ushqyshsyz ushý apparattary taktıkalyq basymdyqtyń negizgi elementine aınaldy. Olardy qoldaný formalary men tásilderiniń evolıýsııasy qazirgi zamanǵy urys qımyldarynyń sıpatyna eleýli túrde áser etedi», deıdi ınstıtýttyń Zertteý qyzmetiniń bastyǵy, polkovnık Alekseı Boıko.
Búginde ushqyshsyz júıelerdi basqarý mamandaryn daıarlaý – Qarýly kúshterdiń basty mindetiniń biri. Onyń júzege asyrylýy jeke quramnyń tehnıkalyq biliktiliginiń ósýi men ushqyshsyz tehnologııalardy qoldaný múmkindikteriniń keńeıýine yqpal etedi.
Buǵan deıin Saǵadat Nurmaǵambetov atyndaǵy Qurlyq áskerleri áskerı ınstıtýtynyń bazasynda UUA mamandaryn daıarlaıtyn áskerı mektep ashylǵan edi. Sondaı-aq Desanttyq-shabýyldaý áskerlerinde ushqyshsyz apparattardy qurastyrý, synaqtan ótkizý men bólimshelerge berý jumystarynyń tolyq sıkli jolǵa qoıyldy.
