Mańǵystaýda dárigerler ústinen qylmystyq is qozǵaldy

AQTAÝ. 25 aqpan. Mańǵystaý oblysynda qyzylshaǵa qarsy ekpeden soń oqýshylardyń aýyr halde qalýy dárigerlerdiń ústinen qylmystyq is qozǵaýǵa soqtyrdy. Bul týraly egemen.kz tilshisi habarlady. Mańǵystaý oblysynyń Jańaózen qalasy mektepteriniń oqýshylary men kolledj stýdentterine, ıaǵnı 16 men 19 jas aralyǵyndaǵy jasóspirimderge júrgizilgen ekpe sońy dúrbeleńge ulasty. Basy aınalyp, aıaq-qoly qurysyp, esinen tanǵan oqýshylardyń sany qazir 100-den asty. Arasynda osy vaksına saldarynan Beıneý aýdanynan kelgen oqýshylar da bar. Oqýshylardyń birqatary Mańǵystaý oblystyq aýrýhanasynyń jansaqtaý bólimine túsken. Al ata-analar arada bir apta ýaqyt ótse de balalarynyń denesi qurysyp, jıi-jıi esterinen tanyp qalatynyn aıtýda. Qazirgi tańda jetkinshekterge salynǵan vaksınadan synama jáne osy ekpe esterinen tandyrǵan balalardan qan alynyp, sot medısınalyq saraptama taǵaıyndaldy, vaksınaǵa taǵaıyndalǵan saraptama qortyndysy 2 aptadan soń daıyn bolmaq. Mańǵystaý oblystyq ishki ister departamenti dárigerlerge farmasevtıkalyq jáne medısınalyq kásibı mindetine salǵyrt qarady degen aıyp taǵyp otyr. Gúlaıym Shyntemirqyzy. Derek: egemen.kz. Sýret: alashainasy.kz.