Kórmege Qazaqstan jáne Qyrǵyz Respýblıkasynyń halyq ártisi, kompozıtor, mýltıaspapshy, esimi álemge tanylǵan vokalıst Dımash Qudaıbergenniń mýzeı qoryna syıǵa tartqan jádigerleri qoıyldy.
Mádenı is-sharanyń ashylýyna óner ıesiniń ózi qatysyp, ekspozısııanyń lentasyn qıdy. Mýzeıge ánshi jeke muraǵatyndaǵy 70-ten astam mýzykalyq aspapty syıǵa tartty. Ondaı aspaptyń biri Dımashqa atasy bala kúninde syıǵa bergen, shyǵarmashylyq jolynda únemi janyna alyp júrgen qasterli dombyrasy bolsa, ekinshisi – óz qoltańbasy qoıylǵan mýzykalyq aspap.
Almaty qalasy Mádenıet basqarmasynyń basshysy Danııar Álıev kórmeniń mazmundyq ereksheligin atap ótse, Almaty qalasy mýzeıler birlestiginiń dırektory Lázzat Saǵyndyqova ánshige hakim Abaı atamyz ustaǵan dombyranyń kóshirmesin usyndy. Onyń aıtýynsha, kórme óneri arqyly halyqtardy jaqyndastyryp júrgen daryndy tulǵanyń shyǵarmashylyǵyn nasıhattap, halyqaralyq deńgeıdegi jetistikterin aıshyqtaı otyryp, ulttyq mýzykalyq aspaptardy dáripteýdi maqsat etedi.
О́z kezeginde Yqylas mýzeıimen birlesken jobanyń mańyzyna toqtalǵan ánshiniń ákesi, Qazaqstannyń mádenıet qaıratkeri, ánshi, sazger, Qanat Aıtbaev is-sharanyń rýhanı-mádenı mańyzyna toqtalyp, ulttyq ónerdi ulyqtap, álem halyqtarynyń mýzykalyq murasyn bir keńistikte toǵystyrǵan taǵylymdy bastama ekenin atap ótti. Al Dımashtyń anasy, Qazaqstannyń eńbek sińirgen qaıratkeri Svetlana Aıtbaevanyń aıtýynsha, kórmege qoıylǵan aspaptar otbasy úshin asa qymbat. Dımashqa syılanǵan aspaptardyń alǵashqysy – Belarýs fanklýby bergen «Gýslı». Kórmede Kýba, Irlandııa, Malaızııa, taǵy basqa elderden jınalǵan aspaptar bar. Olardyń árqaısysy álemdegi myqty degen sheberlerdiń qolynan shyqqan.
Kórme jádigerleriniń qatarynda saha halqynyń dástúrli aspaby, Maıkl Djeksonnyń jeke stılısi Goko Zaldı arnaıy ázirlegen sahnalyq kostıým, áıgili rýmyn vırtýozy George Zamfır syılaǵan pan-fleıta erekshe qyzyǵýshylyq týǵyzady.
Kórmede almatylyq kishkentaı ónerpazdar Dımashtyń repertýaryndaǵy birqatar ándi oryndap, kópshiliktiń yqylasyna bólendi.
ALMATY
