Kollajdy jasaǵan – Almas MANAP, «EQ»
Qazirgi álemdegi áskerı-saıası ahýaldyń jedel ózgerýi, geosaıası turaqsyzdyqtyń beleń alýy, qaqtyǵystyń gıbrıdti formalarynyń keńinen taralýy men áskerı salada sıfrlyq tehnologııalardyń belsendi engizilýi sıfrlandyrý máselesin strategııalyq mańyzǵa ıe mindet deńgeıine shyǵaryp otyr. Memleket basshysy búgingi áskerimiz mobıldi, joǵary tehnologııaly, ózgermeli jaǵdaıǵa beıim bolýǵa, ýaqtyly ári senimdi derekterge negizdelgen basqarý júıesimen tolyq qamtamasyz etilýge tıis ekenin jıi aıtyp keledi. Bul oraıda sıfrlyq transformasııa áskerdiń jaýyngerlik qabiletin arttyrýdyń, basqarý tıimdiligin kúsheıtýdiń jáne jańa syn-qaterlerge jedel den qoıýdyń sheshýshi faktory sanalady.
Qorǵanys mınıstrligi Aqparattyq tehnologııalar departamentiniń bastyǵy, podpolkovnık Bekjan Myrzaǵalıevtiń aıtýynsha, osy oraıda Qarýly kúshterdi sıfrlandyrý qosalqy baǵyt retinde emes, memlekettiń qorǵanys qabiletin nyǵaıtýdyń, áskerdi basqarý júıesiniń tıimdiligin arttyrýdyń jáne barlyq deńgeıde sheshim qabyldaý júıesin qamtamasyz etýdiń negizgi tetikteriniń biri retinde qarastyrylyp otyr.
«Prezıdent tapsyrmalaryn oryndaý maqsatynda Qarýly kúshterde ásker men qarý-jaraqty basqarýdyń avtomattandyrylǵan júıelerin qurý men engizýdiń uıymdastyrýshylyq, tehnıkalyq ári normatıvtik is-sharalar kesheni kezeń-kezeńimen júzege asyrylyp jatyr. Atalǵan júıeler barlyq deńgeıdegi komandırler men shtabtarǵa áskerı-saıası jáne aǵymdaǵy ahýal týraly, kúshter men quraldardyń quramy, olardyń daıyndyq deńgeıi men qamtamasyz etilýi jónindegi ózekti aqparatqa jedel qol jetkizý múmkindigin beredi», deıdi podpolkovnık B.Myrzaǵalıev.
Onyń aıtýynsha, avtomattandyrylǵan basqarý júıelerin paıdalaný qabyldanatyn sheshimderdiń jedeldigin arttyrýǵa, josparlaý men buıryqtardy jetkizý ýaqytyn qysqartýǵa, bólimsheler is-qımylynyń úılesimdiligin kúsheıtýge, sondaı-aq adam faktoryna baılanysty táýekelderdi tómendetýge múmkindik beredi. Nátıjesinde, bul áskerlerdiń jaýyngerlik daıarlyq deńgeıi men qoıylǵan mindetterdi oryndaý qabiletine tikeleı yqpal etedi.
«Kadr daıarlaý, áskerge shaqyrý men jumyldyrý úderisterin sıfrlandyrý da – basym baǵyttyń biri. Jeke quramdy esepke alýdyń biryńǵaı sıfrlyq kontýryn qalyptastyrý derekterdiń tolyqtyǵyn, ózektiligin jáne shynaıylyǵyn qamtamasyz etýge, áskerı qyzmet ótkerý rásimderiniń ashyqtyǵyn arttyrýǵa, sondaı-aq kadrlyq resýrstardy josparlaý tıimdiligin kúsheıtýge septigin tıgizedi», dep túsindirdi QM Aqparattyq tehnologııalar departamentiniń bastyǵy.
Podpolkovnık B.Myrzaǵalıev logıstıka men resýrstardy basqarýdy sıfrlandyrýǵa da aıryqsha den qoıylyp jatqanyn aıtty. Berilgen málimetterge qaraǵanda, Qarýly kúshterde qarý-jaraq pen áskerı tehnıkany, oq-dárilerdi, materıaldyq-tehnıkalyq quraldardy, medısınalyq jáne tyldyq qamtamasyz etýdi avtomatty túrde esepke alý júıeleri kezeń-kezeńimen engizilip, odan ári damyp jatyr. Mundaı tásil bıýdjet qarajatyn jumsaýdyń ashyqtyǵyn qamtamasyz etip, baqylaýdy kúsheıtedi ári laýazymdy tulǵalardyń jeke jaýapkershiligin arttyrady.
Sondaı-aq sıfrlyq logıstıka jabdyqtaý úderisterin ońtaılandyrýǵa, josparlaý dáldigin arttyrýǵa, tehnıkany jóndeý men tehnıkalyq qyzmet kórsetýge degen qajettilikti der kezinde anyqtaýǵa, buǵan qosa áskerlerdi qamtamasyz etý barysynda beıbit ýaqyttaǵy kúndelikti qyzmette de, jaýyngerlik mindetterdi oryndaý kezinde de irkilisterdiń týyndaý yqtımaldyǵyn tómendetýge múmkindik beredi.
Sala mamandary sıfrlyq transformasııa júıesinde jasandy ıntellekt tehnologııalaryn engizý erekshe oryn alatynyn aıtyp otyr. Bul tehnologııalar basqarýshylyq sheshimderdi qoldaý, táýekelderdi baǵalaý men áskerı nysandardy kúzetý, qorǵaý tıimdiligin arttyrý maqsatynda qoldanylady.
Aýqymdy sıfrlandyrý úderisin júzege asyrý osy salaǵa mamandanǵan ári bilikti kadrlarsyz múmkin emes ekeni belgili. Soǵan baılanysty Qarýly kúshter qatarynda zamanaýı sıfrlyq biliktilikke ıe ofıserler men mamandar korpýsy daıarlanyp jatyr. Azamattyq IT-sektormen, otandyq sala mamandarymen jáne ǵylymı uıymdarmen ózara is-qımyl jolǵa qoıylyp, qoldanbaly sıpattaǵy bilim baǵdarlamalary engizilip keledi.
«Sıfrlyq múmkindikterdi keńeıtýmen qatar, onyń táýekelderi de eskeriledi. Sıfrlyq transformasııa kezinde senimdi kıberqorǵanysty qamtamasyz etý men tehnologııalyq egemendikti nyǵaıtý máseleleri birinshi kezektegi mańyzǵa ıe. Osylaısha, Qarýly kúshterdiń sıfrlyq múmkindikteriniń damýy Prezıdent tapsyrmalaryn júıeli ári dáıekti oryndaýdyń nátıjesi bolyp otyr jáne ol zamanaýı, ornyqty ári tehnologııalyq turǵydan damyǵan armııa qalyptastyrýǵa baǵyttalǵan strategııalyq baǵytty aıqyndaıdy», deıdi B.Myrzaǵalıev.
Qoryta aıtqanda, mamandar sıfrlandyrý úderisi áskerdi basqarýdyń tıimdiligin arttyrýdyń, qorǵanys júıesiniń ornyqtylyǵyn qamtamasyz etýdiń, Qarýly kúshterdiń qazirgi jáne bolashaq syn-qaterlerge qarsy turýy úshin qabiletin jan-jaqty arttyrýdyń sheshýshi faktoryna aınalǵanyn biraýyzdan aıtady. Bul – zaman kóshinen qalyp qoımaı, aldyńǵy qatarly eldermen birge damyp, ilgeri basýdyń birden-bir joly.
