Petropavldyq turǵyn ózi qurastyrǵan kólikpen júldeli boldy

PETROPAVL. 25 aqpan. Petropavlda tuńǵysh ret «Mashınalar jarysy» atty avtorallı uıymdastyrylyp, 15 adam synǵa tústi. Bul týraly oblystyq dene shynyqtyrý jáne sport basqarmasynyń baspasóz qyzmeti habarlady. Jarysty uıymdastyrýshylardyń biri Alekseı Bıbıkovtyń aıtýyna qaraǵanda, máreden shyǵyp, sórege jeter trassanyń kúrdeli bolýy oılastyrylypty. Avtomobılderdiń markalary men shyǵý merzimderine shek qoıylmaǵan. Alaıda, «qoldan jasalǵan» kedergilerge qaramastan jarysqa qatysýshylardyń bári jarysty sátti aıaqtaǵan. Sóreni birinshi bolyp Land Cruiser sheteldik júrdek kóliktiń ıesi Artem Dýbrovskıı qıǵan. Ol mol tájirıbeniń arqasynda qarsylastaryn shań qaptyryp ketken. Al, óz qolymen jınap, qurastyrǵan «Gaz-69» keńestik kólikpen ózgelerge básekeles bola bilgen Vladımır Gnedko úshinshi oryndy jeńip alǵan. Bilegi myqty óńkeı er azamattar arasynda «arpa ishindegi bir bıdaıdaı» kóringen Marııa Vrjes úshtikke iline almasa da, jarysqa úkilep qosqan «Nıva» markaly «sáıgúliginiń» jolda qaldyrmaǵanyna rıza. «Mashınalar jarysyn» jylda ótkizýdi josparlap otyrmyz. Kórermenderdiń kóńilinen shyqqan bolý kerek, qazirdiń ózinde qatysýǵa tilek bildirýshilerdiń qatary qalyń. Soǵan sáıkes, jarys sharttaryn qaıta qaraıtyn bolamyz. Tigiletin júldeler sanyn da arttyramyz», deıdi A. Bıbıkov. О́mir Esqalı. Derek: Soltústik Qazaqstan oblystyq dene shynyqtyrý jáne sport basqarmasynyń baspasóz qyzmeti. Sýret: bigbo.ru.