Rýhanı kemeldilikke tárbıeleıtin kitap jaryq kórdi

ASTANA. 13 mamyr. Qazaqstannyń eńbek sińirgen qaıratkeri, Prezıdent syılyǵynyń laýreaty, jýrnalıst-jazýshy Qaısar qajy Álimniń «Mekke, Mádınam meniń!» atty kitaby jaryq kórdi. Bul týraly egemen.kz habarlady. Eńbekte avtordyń Mekke, Mádınaǵa jasaǵan qajylyq sapary, ımandylyq qundylyqtaryna negizdelgen oı-paıymy, ishki sezim-syry baıandalady. Kitaptyń jazylýy týraly Qaısar qajynyń alǵy sóz retinde berilgen «Júrek sózi» nemese jolaı joǵalǵan júgimniń Allanyń qudiretimen qolyma tutastaı tabystalǵany týraly» atty túsindirme jazbasynda keńinen aıtylǵan. Qajylyqtan elge oralǵan kezde Astana áýejaıynda qalamgerdiń qolyna júginiń bir bóligi ǵana tıedi. Al joǵalǵan júktiń ishinde Quran kitaptary, Qaǵba beınelengen kilemsheler, jaınamaz, tasbıh sekildi syı-sııapattary bolǵan eken. Janyna batqany – qasterli mekende shyn yqylaspen júrgizgen kúndelik-qoljazbasy da sol qapshyqtyń ishinde ketýi edi. «Sol kúndelik-qoljazbam qaıtpaǵanda, bul kitabym – qajylyq paıymym qalaı jazylar edi dep, kúńirenip, ile táýbeme kelemin! Jazylar-aý, biraq izin sýytpaı dápterime túrtken, derekterdiń dálme-dáldigi, týlaǵan sezim ushqyny, ımandylyq ıirimi, tazarǵan júrek sózi, bári-bári aına qatesiz sol kúıinde til ushyna oralar ma edi, oralmas pa edi...» – degen qalamger bolǵan iske shúkirshilik aıtady. Jańa týyndy «Mekke» jáne «Mádına» atty eki bólimnen turady. Mazmunyn sapaly sýretter aıshyqtaǵan kitap oqyrmanyn rýhanı kemeldilikke tárbıeleıdi. Elaman Qońyr. Derek, sýret: egemen.kz.