Bıyl segizinshi ret ótkizilip otyrǵan «Mektepke jol» aksııasy áleýmettik jaǵynan az qamtylǵan otbasy balalaryna degen kómektiń jarqyn úlgisi ispetti. Igi bastama Aqmola óńirinde de memlekettik qamqorlyqpen qatar, buqaralyq sıpat alyp jatqany qýanyshty.
Oblystyq bilim basqarmasynyń basshysy Balym Izbasarovanyń aıtýynsha, ótken jyly muqtaj otbasylardyń 6359 balasyna bıýdjetten 30 mıllıon teńge qarjy bólinip, materıaldyq kómek kórsetildi. Sonymen birge, áleýmettik jaǵdaıy tómen otbasylardyń 5197 balasyna demeýshiler tarapynan oqý qural-jabdyqtary men kıim-keshekter alyp berilgen. Bıyl, aldyn ala jasalǵan boljam boıynsha, 10637 oqýshyǵa materıaldyq kómek qajet. Onyń ishinde 861 bala mektep tabaldyryǵyn alǵash ret attaǵaly otyr. Tamyz aıy kóńil ósirerlik sharalarmen bastaldy. Gazetimizdiń tilshiler qosynyna kún saıyn derlik jaqsy habarlar túsip jatyr. Onyń alǵashqysyn «Aksııany depýtattar bastady» degen ataýmen jarııalaǵan edik. Halyq qalaýlylary belsendiligi áli de tómendemeýde. Ásirese, «Nur Otan» partııasy Aqmola fılıalynyń uıymdastyrýymen «Baqytty balalyq» jobasy jurtshylyq nazaryn aýdarǵanyn aıtqymyz keledi. Aqmola oblys- tyq jáne Kókshetaý qalalyq máslıhatynyń depýtattary qazirdiń ózinde úsh dúrkin qaıyrymdylyq kezdesýin ótkizdi. Máselen, partııa fılıaly ǵımaratynyń alańyndaǵy saltanatqa júzden astam adam jınaldy. «Jas Otan» jastar qanatynyń, «Dostar» mádenıet saraıynyń jáne «Áýlet» mektepke deıingi oqytý ortalyǵynyń konserttik baǵdarlamasy qoıyldy. Bul kúni depýtattyq fraksııa músheleri 49 oqýshyǵa 1 mıllıon teńgeniń aqshalaı sertıfıkatyn úlestirdi. Igi isten Qazaqstan Parlamenti Senatynyń depýtaty, jerles jazýshy Jabal Erǵalıev te shet qalmaı, úsh otbasynyń qýanyshyn eselegeni balalar janyn jadyratty. Al, oblystyq máslıhattyń depýtaty Murat Temirjanov óz okrýgindegi 14 balaǵa qomaqty syılyqtar usyndy. «Nur Otan» partııasy ob- lystyq fılıaly tóraǵasynyń orynbasary Ǵalym Bekmaǵambetov, oblystyq máslıhattyń depýtattary Saǵyntaı Elýbaev, Serik Aıaǵanov, Elena Mashınskaıa, olardyń qalalyq máslıhattaǵy áriptesteri Serik Kákenov, Baýyrjan Ǵaısa, Janat Ábishov jurtshylyqty qaıyrymdylyq pen ımandylyqqa shaqyrsa, kóp balaly ana Natalıa Nıkýlına kópshilik atynan alǵysyn bildirdi. Mundaı sharalar oblystyń barlyq aýdandary men qalalarynda da ótkizildi. Oǵan qatysqan 125 «Nur Otandyq» depýtat 168 búldirshinge 3 mıllıon 485 myń teńgeniń materıaldyq kómegin kórsetti.
Baqbergen AMALBEK, «Egemen Qazaqstan».
Aqmola oblysy.
