Atyraý aeroportyna Hıýaz Dospanovanyń esimi berildi

ASTANA. 13 mamyr. Atyraýdaǵy halyqaralyq aeroportqa Halyq Qaharmany, Uly Otan soǵysynyń ardageri, qazaqtyń dańqty ushqysh qyzy Hıýaz Dospanovanyń esimi berildi. Bul týraly liter.kz habarlady. Atalǵan aeroportta Uly Jeńistiń 70 jyldyǵyna oraı merekelik shara uıymdastyrylyp, sol jerde qýanyshty jańalyq jarııa etildi. Aeroport basshylyǵynyń aıtýynsha, olarǵa oblystyq ákimdikten hat kelip túsken. Onda bastamashy top pen Parlament depýtattarynyń Hıýaz Dospanovanyń esimin berý týraly usynystary aıtylǵan. Bul usynysty aeroport qyzmetkerleri biraýyzdan qoldap, maquldady. Hıýaz Dospanova 1922 jyly 15 mamyrda sol kezdegi Gýrev (qazirgi Atyraý) oblysyna qarasty Ganıýshkın aýylynda týǵan. 1940 jyly Oral qalasyndaǵy №1 mektepti altyn medalmen bitirgen. Keıin Máskeýdegi Jýkovskıı atyndaǵy áskerı-áýe akadmeıasyna qujat tapsyrady. Alaıda, akademııa qyz balany qabyldaýdan bas tartady. Esesine, Birinshi Máskeý medısınalyq ınstıtýtyna emtıhansyz qabyldanady. Zulmat jyldarda 588-shi túngi bombalaýshy áýe polkiniń shtýrman-atqyshy boldy. Jaý tylynda kóptegen áskerı tapsyrmalardy oryndaǵan. Eki ret aýyr jaraqat alyp, qaıtadan sapqa qosylǵan. Jeńisti Berlın túbinde qarsy aldy. Eren erligi úshin birqatar nagradalarmen marapattaldy. 2004 jyldyń 7 jeltoqsanynda Qazaqstan Prezıdentiniń Jarlyǵymen Halyq Qaharmany ataǵy berildi. Hıýaz Dospanova 2008 jyly 20 mamyrda qaıtys boldy. Qazirgi tańda Atyraýdaǵy sport saraıy jáne «Eır Astana» áýe kompanııasynyń «Embraer 190» laıneri batyrdyń esimimen atalady. Elaman Qońyr. Derek: liter.kz. Sýret: headline.kz.