shshshshQazir óz isimdi ashamyn degen adamǵa múmkindik mol. Tek táýekeliń tursyn de. Mártók aýdandyq aýyl sharýashylyǵy bóliminiń basshysy Shamıl Sarıev áńgime barysynda táýekelge baryp, sharýa qojalyǵyn ashyp, kásipkerliginiń kókjıegin keńeıte bastaǵan azamatpen tanystyrýǵa ýáde etti. Aýdan ortalyǵyndaǵy jumysymyz aıaqtala kele, Elek ózeniniń boıyndaǵy osy maldy aýylǵa bastady. Mártók selosynan shyǵa jol jıeginde turǵan mashınaǵa kózimiz tústi.
Mine, ózi de kútip tur eken, dep Shakeń aýyz jıǵansha, ashań júzdi, qapsaǵaı deneli, ıyqty jigit kelip amandasty. Biz kele jatqan «Esbol» sharýa qojalyǵynyń jetekshisi Muhammethan Qarsaqov eken. Sharýa qojalyǵy mal baǵyp otyrǵan jaılaý da onsha qashyq bolmady, kúre joldan solǵa burylyp, qyrdan túsken boıda etekte qojalyqtyń jaılaýy jamyraı kórindi. Jańadan ashylǵan sharýa qojalyǵynda 100-den astam iri qara, 300-den astam qoı ustalýda. Birinshi kózge túskeni eki palatka men mal qamaıtyn ashyq aýla ǵana. Árirekte qoı men iri qara jaıylyp jatyr. Jer irip tur, kók maısa. Bizdiń kóńilimizdiń qońyltaqsyǵanyn baıqady ma, Muhammethan Qarsaqovtyń ózi áńgime tizginin qolǵa aldy. – Alǵashqy kezdegi qıyndyqtar ǵoı. Ázirge malshylarymyz palatada turady, geologtar sııaqty. Esesine Elektiń sýy jaqyn. Bul jaılaýdy ákimdik ýaqytsha berip otyr. Keıin óz jerimiz bolady, – dedi sharýa qojalyǵynyń basshysy. Shyndyǵynda da, onyń sharýa qojalyǵyn qurǵanyna kóp bola qoımapty. Bárin jańadan bastapty. 2012 jyly óziniń aýlasyndaǵy 20 iri qarasymen «Esbol» sharýa qojalyǵyn quryp, bir jyldan keıin «Jumyspen qamtýdyń jol kartasy-2020» memlekettik baǵdarlamasy boıynsha 3 mıllıon teńge jeńildetilgen nesıe alyp, oǵan aýdandaǵy asyl tuqymdy qyrdyń qyzyl sıyryn ósiretin «Qyzyljar» sharýashylyǵynan 20 qashar satyp alyp, tabynǵa qosypty. Sol jolǵy alǵan nesıeni yrǵalyp-jyrǵalmaı ótep te tastapty. Odan keıin bankten shaǵyn nesıe boıynsha 18 mıllıon teńge alyp, 300 qoı satyp alǵan. Qazir iri qara 100-den asqan. Bıyl taǵy da 70 buzaý tabynǵa qosylypty. Asyl tuqymdy on buqa satyp alǵan. Olardyń árqaısysyna memleketten 104 teńge sýbsıdııa alady. – Bolashaqta saýyn sıyr sanyn kóbeıtip, Keńsahara aýylynan taýarly-sút fermasyn ashsaq dep otyrmyz. Asyl tuqymdy qyrdyń qyzyl sıyrlarynyń barlyq maldárigerlik-zootehnıkalyq ǵylymı jumystary júrgizilýde. Qazir úsh elektrmen sút saýatyn apparatymyz bar, 60 sıyr saýamyz, – deıdi Muqammethan. Sharýa adamy jaıylymda kún batareıasyn paıdalanyp otyr. Bul joly da «Jumyspen qamtýdyń jol kartasy-2020» baǵdarlamasy qoldaý kórsetken. Ony byltyr alypty. Qazir ıgiligin kórip otyr. Sút saýady, tartady. Al, jaılaýdaǵy maldyń jaýapkershiligi jergilikti tórt malshynyń moınynda. Ázirge qysqy kezeńge qajetti jemshópti satyp alýda. Bolashaqta tehnıka satyp alýdyń qamyn jasaýda. Ol ózi 2008 jyly Qaraqalpaqstannan atbasyn atamekene burǵan eken, osy Mártókke taban tirepti. Qatelespegeni kórinip tur. Ejelden osynda turyp jatqan qandastarymyz júreksinip júrgende óz kúshine, bilimine sengen ol qolǵa alǵan isin dóńgeletip keledi. Joǵary bilimdi ekonomıst bolǵandyqtan shyǵar, ishki esebi de joq emes, zııanǵa qalmaımyz, áıteýir, dep kúlimsireıdi.
Satybaldy SÁÝIRBAI, «Egemen Qazaqstan».
Aqtóbe oblysy. Mártók aýdany.
