Prezıdent jumys saparymen Ońtústik Qazaqstanǵa bardy

ASTANA. 26 naýryz. Memleket basshysy Nursultan Nazarbaev Ońtústik Qazaqstan oblysyna jumys saparymen bardy. Bul týraly akorda.kz habarlady. Ońtústik Qazaqstanǵa jumys sapary aıasynda N.Nazarbaev «Adelıa» sharýa qojalyǵy jylyjaıynyń jumysymen tanysty. Indýstrııalandyrý kartasy aıasynda júzege asyrylǵan «Adelıa» sharýa qojalyǵy jylyjaı kesheniniń óndiristik qýaty jylyna 6 myń tonna ónim óndirýge jetedi. Kásiporynda shamamen 200 jańa jumys orny qurylǵan. Jylyjaı keshenin basqarý tolyǵymen avtomattandyrylǵan. Nysan fransýzdyq Rishel kompanııasynyń zamanaýı jabdyqtarymen jabdyqtalǵan. Prezıdent sondaı-aq, oblystyń kásipkerlerimen jáne aýyl sharýashylyǵy taýaryn óndirýshilermen áńgimelesip, óńirdiń áleýmettik-ekonomıkalyq oń kórsetkishterin atap ótti. – Ońtústik Qazaqstan oblysynda agroónerkásip kesheni úshin barlyq qajetti jaǵdaı jasalǵan. Memleket aýyl sharýashylyǵyn damytý isine jan-jaqty qoldaý kórsetip, qajetti qarajat bólýde. Bes jylda óńirde 2,3 mıllıon tonna kókónis óndirildi. Qazaqstanda mundaı joǵary kórsetkishteri men tabıǵı jaǵdaılary bar basqa óńir joq. Qazir biz Eýrazııalyq ekonomıkalyq odaq elderimen shekaramyzdy ashyp jatyrmyz. Osyǵan baılanysty bizge ózimizdi ǵana emes, kórshi elderdi de ónimmen qamtamasyz etý qajet, – dedi Memleket basshysy. Memleket basshysy elimizde kólik ınfraqurylymyn damytýdyń qajettigine de nazar aýdardy. – Eger elde jaqsy joldar bolmasa, saýda damymaıdy, sáıkesinshe ekonomıka da órkendemeıdi. Sondyqtan biz qazir eldiń barlyq óńirinde kólik jelilerin salyp jatyrmyz, myńdaǵan jumys oryndary ashylýda. Ár óńirdiń aldyna naqty mindetter qoıylǵan, sony oryndaý jumystaryn jalǵastyrý qajet, – dedi Prezıdent. Agrarlyqtar Nursultan Nazarbaevqa aýyl sharýashylyǵy salasyndaǵy shaǵyn jáne orta bıznes kásiporyndaryna kórsetilip otyrǵan memlekettik qoldaý úshin rızashylyqtaryn bildirdi. Joldybaı Bazar. Derek, sýret: akorda.kz.