Polısııa qyzmetkeri... adam óltirdi

Iá, solaı, polıseı aıdyń-kúnniń amanynda adam óltirdi. Basqasy basqa, polısııa qyzmetkeri adam óltirýshi me edi deısiz ǵoı. О́ıtkeni, adam bireýden zábir kórse, quqy taptalsa, kisi óltirýshiler kelse, eń áýeli polıseılerge shaǵym aıtady. Biraq, «Bir qaryn maıdy bir qumalaq shiritedi» degendeı, qazirgi kúni qoı terisin jamylǵan qasqyr keıpindegi pogon taqqandardyń kezdesetini ókinishti-aq. Bulaı deýimizge talaı mysal bar. Sonyń biri Atyraýdaǵy polısııa qyzmetkeriniń adam óltirý kúdigimen qamaýǵa alynýy der edik. Naqtylaı aıtqanda, quqyq qorǵaý ornyna jergilikti azamat óziniń týysynyń iz-túzsiz joǵalǵany týraly shaǵymdanǵan. Joǵalǵan azamatty izdestirý barysynda bul qylmysqa polısııa qyzmetkeriniń qatysy bar degen aqparat alyndy, dep habarlady oblystyq ishki ister departamentiniń baspasóz hatshysy Gúlnázıra Muhtarova. Sodan qazirgi kúni osy qylmysqa kúdikti 1993 jyly týǵan polısııa qyzmetkeri anyqtalyp, ustalǵan. Izdestirý sharalarymen qaladan 33 shaqyrym qashyqtaǵy Atyraý-Inder tas jolynyń Alǵa aýyly tusynda, dalada kómilip tastalǵan jábirlenýshiniń denesi tabylǵan. Qazir adam óltirý qylmysyna kúdikti ekeý, biri – polısııa qyzmetkeri, ekinshisi – О́zbekstan Respýblıkasynyń azamaty ýaqytsha oqshaýlaý ornyna qamaýǵa alyndy. Al budan keıin, ıaǵnı qaraqshylyq jolmen adam óltirgen polıseılerge degen senim qarapaıym halyqta qalaı bolmaq? Mundaı soraqylyqqa IIM basshylyǵy ne deıdi? Adam óltirý jalǵasa bere me? Álde tyıyla ma? Joldasbek ShО́PEǴUL, «Egemen Qazaqstan». ATYRAÝ.