Ata zań jobasyn qoldaıtyndar – 89 paıyz

10 ret

kórsetildi

3 mın

oqý úshin

El azamattarynyń 89,2%-y jańa Konstıtýsııa jobasyn qoldaıdy. Muny Qazaqstan qoǵamdyq damý ınstıtýty áleýmettanýlyq saýalnama negizinde anyqtady. Zertteý Mádenıet jáne aqparat mınıstrliginiń tapsyrysymen bıyl 12-20 aqpan aralyǵynda telefon arqyly 17 oblysty jáne respýblıkalyq mańyzy bar 3 qala – Astana, Almaty, Shymkentti qamtydy.

Zeıin ERǴALI

Irikteme jıyntyq kólemi – 1200 respondentti qurady. Baılanys stasıonarlyq jáne mobıldi telefon nómirleri arqyly júzege asqan. Saýalnama OSK-nyń resmı habarlamasyna sáıkes júrgizilgen.

Aldaǵy referendým týraly halyqtyń habardarlyǵy men Ata zańnyń jobasyn qoldaý deńgeıin zerdeleý jónindegi áleýmettanýlyq saýalnama nátıjesinde otandastarymyzdyń 81,8 paıyzy elimizde referendým ótkizý josparlanyp otyrǵanyn biletinin kórsetken. Olardyń 33,7%-y referendým týraly anyq habardar bolsa, al 48,1%-y bul týraly estigen, biraq egjeı-tegjeı bilmeıtin kórinedi. Jańa Konstıtýsııa jobasy boıynsha referendým týraly eshteńe estimegender úlesi – 17,1%-dy qurap otyr.

Saýalnamaǵa qatysqandar arasynda jalpy habardarlyqtyń joǵary kórsetkishi, onyń ishinde referendým týraly estigender úlesi Jambyl (89,7%), Shyǵys Qazaqstan (87,8%), Qyzylorda (89,1%), Batys Qazaqstan (88,1%) oblysy men Almaty qalasynda (87,6%) joǵary.

Esesine, jastar (44,8%) aldaǵy referendým týraly aqparatqa qanyq. Al aǵa býyn egjeı-tegjeıin bilmese de (51,7%) jalpy joǵary habardar ekenin kórsetti.

Sondaı-aq jańa Konstıtýsııa jobasy boıynsha referendým ótkizý týraly habardarlyq deńgeıi respondentterdiń bilim deńgeıimen de baılanysty. Azamattardyń bilim deńgeıi joǵary bolǵan saıyn, habardar bolýdyń jalpy kórsetkishi de artady. Máselen, joǵary bilimi bar saýalnamaǵa qatysqandardyń 86,7%-y qandaı da bir dárejede referendým ótkizý týraly estigen bolsa, orta arnaıy, kásiptik bilimi bar saýalnamaǵa qatysqandardyń 74,3%-y referendým týraly habardar.

Telefon saýalnamasyna qatysqandardyń basym kópshiligi (76,9%) eldegi saıası reformalar men saıası ózgerister týraly aqparatty áleýmettik jelilerden (Tik-tok, Telegram, Instagram, Facebook, V Kontakte jáne t.b.) alatynyn kórsetti. Al úshten biri (33,3%) mundaı jańalyqtardy ınternet-saıttardan biledi. Saýalnama qatysýshylarynyń 20,5 paıyzy teledıdardy aqparat kózi retinde atap ótti.

«Siz Jańa Konstıtýsııa jobasy boıynsha referendýmǵa qatysýdy josparlap otyrsyz ba?» degen suraqqa respondentterdiń basym bóligi ıaǵnı 72,8 paıyzy – oń jaýap berip, bul olardyń azamattyq paryzy ekenin atap ótti. Azamattardyń 17,9%-y áli referendýmǵa qatysyp-qatyspaıtyny týraly naqty sheshim qabyldamaǵanyn jetkizdi. Respondentterdiń ishinde referendýmǵa qatysýdy múldem josparlamaǵandar – 9,3 paıyz.

Joǵary áleýetti elektoraldyq belsendilik Túrkistan (82,7%), Batys Qazaqstan (78,6%), Qaraǵandy (78,1%), Qyzylorda (76,1%), Jambyl (75,0%) jáne Soltústik Qazaqstan oblysynda (75,0%) baıqaldy.

Referendýmǵa qatysýǵa eń joǵary daıyndyqty jastar (82,2%) men 29-45 jas aralyǵyndaǵy azamattar (76,3%), sondaı-aq joǵary bilimdi (74,4%), jalpy orta bilimdi (75,0%) respondentter kórsetti.

Alynǵan derekterge sáıkes, saýalnama qatysýshylarynyń 52,8%-y jobany tolyqtaı qoldaıtynyn, al 36,4%-y jobany qoldaýǵa beıim ekenin aıtty. Al túrli sebeppen jańa Ata zań jobasyn qoldamaıtyn nemese áli tańdaýyn jasamaǵandar úlesi bar-joǵy – 10,8%.